தாய்லாந்தில் இருந்து சென்னைக்கு கடத்தி வந்த ரூ.23.5 கோடி மதிப்புடைய உயர் ரக கஞ்சா பறிமுதல்: பெண் உள்பட 3 கடத்தல் குருவிகள் கைது

மீனம்பாக்கம்: தாய்லாந்திலிருந்து விமானத்தில் சென்னைக்கு கடத்திக் கொண்டுவரப்பட்ட ரூ.23.5 கோடி மதிப்புள்ள 23.48 கிலோ உயர் ரக கஞ்சா பறிமுதல் செய்யப்பட்டது. இதுதொடர்பாக, பெண் கடத்தல் பயணி உள்பட 3 பேரை கைது செய்தனர். தாய்லாந்து தலைநகர் பாங்காக்கில் இருந்து தனியார் பயணிகள் விமானம் ஒன்று நள்ளிரவில் சென்னை சர்வதேச விமான நிலையத்திற்கு நேற்று வந்தது. அந்த விமானத்தில் வந்த பயணிகளை சுங்கத்துறை தனி அதிகாரிகள் தீவிரமாக கண்காணித்தனர். அப்போது விமானத்தில் ஒரு பெண் உள்பட 3 இந்திய பயணிகள் தாய்லாந்து நாட்டிற்கு சுற்றுலாப் பயணிகளாக சென்று விட்டு திரும்பி வந்தனர். அவர்கள் மீது சுங்க அதிகாரிகளுக்கு சந்தேகம் ஏற்பட்டவே அவர்களுடைய உடைமைகளை முழுமையாக பரிசோதித்தனர்.

அவர்களுடைய உடைமைகளுக்குள் மறைத்து வைத்திருந்த உயர்ரக பதப்படுத்தப்பட்ட 24 கஞ்சா பாக்கெட்டுகளை கண்டுபிடித்தனர். அதில் மொத்தம் 23.48 கிலோ உயர் ரக பதப்படுத்தப்பட்ட கஞ்சா இருந்தது. இதன் சர்வதேச மதிப்பு ரூ.23.5 கோடி. இதையடுத்து பெண் கடத்தல் பயணி உள்பட 3 பயணிகளையும், சுங்க அதிகாரிகள் கைது செய்து கஞ்சா பாக்கெட்களையும் பறிமுதல் செய்தனர். அதோடு அவர்கள் 3 பேரையும், சுங்க அதிகாரிகளின் தனிப்படையினர் தீவிரமாக துருவி துருவி விசாரித்தனர். அப்போது இவர்கள் மூன்று பேருமே கடத்தல் குருவிகள்தான். இவர்களை இந்த கடத்தலுக்கு பயன்படுத்தி தாய்லாந்து நாட்டிற்கு அனுப்பி வைத்த முக்கிய கடத்தல் ஆசாமி மற்றொருவர் என்று தெரிய வந்ததால் மேலும் தொடர் விசாரிக்கின்றனர்.

The post தாய்லாந்தில் இருந்து சென்னைக்கு கடத்தி வந்த ரூ.23.5 கோடி மதிப்புடைய உயர் ரக கஞ்சா பறிமுதல்: பெண் உள்பட 3 கடத்தல் குருவிகள் கைது appeared first on Dinakaran.