டெல்லி சட்டமன்ற தேர்தல் வாக்காளர்களுக்கு பணம் கொடுக்கிறது பாஜ: கெஜ்ரிவால் குற்றச்சாட்டு

புதுடெல்லி: டெல்லி சட்டமன்ற தேர்தலில் வாக்காளர்களுக்கு பாஜ பணம் கொடுக்கிறது என்று கெஜ்ரிவால் குற்றம்சாட்டியுள்ளார். டெல்லியில் அடுத்த மாதம் 5ம் தேதி சட்டமன்ற தேர்தல் நடக்கிறது. இதில், ஆம் ஆத்மி, பாஜ, காங்கிரஸ் இடையே கடும் போட்டி நிலவுகிறது. டெல்லி சட்டசபை தேர்தலுக்காக ஆம் ஆத்மி ஒருங்கிணைப்பாளரும், முன்னாள் முதல்வருமான அரவிந்த் கெஜ்ரிவால் தீவிர பிரசாரத்தில் ஈடுபட்டுள்ளார். மேலும், பாஜ, காங்கிரஸ் கட்சியும் பிரசாரத்தில் ஈடுபட்டு வருகிறது. இந்நிலையில் வாக்காளர்களுக்கு பாஜ பணம், தங்கச்சங்கிலி, சேலைகள் கொடுப்பதாக அரவிந்த் கெஜ்ரிவால் குற்றம்சாட்டியுள்ளார்.

இதுகுறித்து அவர் நிருபர்களிடம் கூறுகையில், ‘பாஜ, தனது அனைத்து ஆயுதங்களையும் ஒப்படைத்து விட்டது. ஏனெனில் அவர்களுக்கு எந்த தொலைநோக்கும், முதல்வர் முகமும் இல்லை. அதேநேரம் வாக்காளர்களுக்கு ஜாக்கெட்டுகள், சேலைகள், பணம், தங்கச்சங்கிலி கொடுத்து வருகிறார்கள். ஓட்டுக்காக பணமோ, பொருட்களோ கொடுக்கும் வேட்பாளர்கள், யாராக இருந்தாலும் அவர்கள் ஆம் ஆத்மியை சேர்ந்தவராக இருந்தாலும் அவர்களுக்கு ஓட்டு போட வேண்டாம் என டெல்லி மக்களை கேட்டு கொள்கிறேன். டெல்லியில் முழு மெஜாரிட்டியுடன் ஆம் ஆத்மி ஆட்சி அமைக்கும்’ என்றார்.

The post டெல்லி சட்டமன்ற தேர்தல் வாக்காளர்களுக்கு பணம் கொடுக்கிறது பாஜ: கெஜ்ரிவால் குற்றச்சாட்டு appeared first on Dinakaran.