"டூரிஸ்ட் பேமிலி" படத்தில் "மம்பட்டியான்" பாடல்.. இசையமைப்பாளர் தமன் மகிழ்ச்சி

சென்னை,

அபிஷன் ஜீவிந்த் இயக்கிய 'டூரிஸ்ட் பேமலி' படத்தில் சசிகுமார், சிம்ரன் நடித்துள்ளனர். யோகி பாபு, எம்.எஸ்.பாஸ்கர், மிதுன் ஜெய்சங்கர், கமலேஷ் ஆகியோர் முக்கிய கதாபாத்திரங்களில் நடித்துள்ளனர். கடந்த மே 1-ந் தேதி வெளியான இப்படம் மக்கள் மத்தியில் நல்ல வரவேற்பை பெற்று வருகிறது. இலங்கை தமிழர்களான சசிகுமார் குடும்பம் அங்குள்ள பொருளாதார சூழல் காரணமாக தமிழகத்துக்குள் சட்டவிரோதமாக நுழைகின்றனர். அதன்பிறகு அவர்களின் வாழ்க்கையில் நடக்கும் சம்பவங்களை நகைச்சுவையுடனும், எமோஷ்னலுடனும் படம் பதிவு செய்துள்ளது.சமீபத்தில் நடிகர் சிவகார்த்திகேயன் 'டூரிஸ்ட் பேமிலி' படத்தின் இயக்குநர் அபிஜன் ஜீவிந், தயாரிப்பாளர் உள்ளிட்ட படக்குழுவை நேரில் அழைத்துப் பாராட்டியுள்ளார். மேலும் 'டூரிஸ்ட் பேமலி' படத்தை பார்த்த இசையமைப்பாளர் அனிருத் இயக்குநரை போனில் அழைத்து பாராட்டியுள்ளார்.

தென்னிந்திய சினிமாவில் முன்னணி இசையமைப்பாளராக வலம் வருபவர் தமன். தமிழில் 'வாரிசு, பிரின்ஸ், எனிமி, ரசவாதி, கேம் சேஞ்சர், புஷ்பா' போன்ற படங்களுக்கு இசையமைத்துள்ளார். தற்போது பல முன்னணி நடிகர்களின் படங்களுக்கு இசையமைத்து வரும் தமன் கடந்த 2003-ம் ஆண்டு வெளியான 'பாய்ஸ்' படத்தில் நடித்திருந்தார். இதயம் முரளி படத்திற்கு தமன் இசையமைத்து நடித்துள்ளார்.

இந்நிலையில், தான் இசையமைத்த 'மம்பட்டியான்' பாடல், 'டூரிஸ்ட் பேமிலி' படத்தில் இடம்பெற்றதற்கு மகிழ்ச்சி தெரிவித்த எக்ஸ் தளத்தில் இசையமைப்பாளர் தமன் பதிவிட்டுள்ளார்.