"டூரிஸ்ட் பேமிலி" பட இயக்குனருக்கு வாழ்த்து தெரிவித்த பிரபல இசையமைப்பாளர்

சென்னை,

'அயோத்தி, கருடன், நந்தன்' உள்ளிட்ட வெற்றிப்படங்களை அடுத்து சசிகுமார் தற்போது நடித்துள்ள படம் 'டூரிஸ்ட் பேமலி'. குட் நைட், லவ்வர் படங்களை தயாரித்த மில்லியன் டாலர் ஸ்டுடியோஸ் இப்படத்தை தயாரித்துள்ளது. அபிஷன் ஜீவிந்த் இயக்கும் இந்தப் படத்தில் சிம்ரன் கதாநாயகியாக நடித்துள்ளார். யோகி பாபு, எம்.எஸ்.பாஸ்கர், மிதுன் ஜெய்சங்கர், கமலேஷ் ஆகியோர் முக்கிய கதாபாத்திரங்களில் நடித்துள்ளனர். கடந்த மே 1-ந் தேதி வெளியான இப்படம் மக்கள் மத்தியில் நல்ல வரவேற்பை பெற்று வருகிறது. இலங்கை தமிழர்களான சசிகுமார் குடும்பம் அங்குள்ள பொருளாதார சூழல் காரணமாக தமிழகத்துக்குள் சட்டவிரோதமாக நுழைகின்றனர். அதன்பிறகு அவர்களின் வாழ்க்கையில் நடக்கும் சம்பவங்களை நகைச்சுவையுடனும், எமோஷ்னலுடனும் படம் பதிவு செய்துள்ளது. இப்படம் தமிழ் நாட்டில் மட்டும் ரூ.20 கோடி வசூல் செய்துள்ளதாக கூறப்படுகிறது.

சமீபத்தில் நடிகர் சிவகார்த்திகேயன் 'டூரிஸ்ட் பேமிலி' படத்தின் இயக்குநர் அபிஜன் ஜீவிந், தயாரிப்பாளர் உள்ளிட்ட படக்குழுவை நேரில் அழைத்துப் பாராட்டினார்.

"டூரிஸ்ட் பேமிலி என்ற மிஷன் நிறைவடைந்தது. இந்த அற்புதமான அறிமுகத்திற்கு வாழ்த்துகள் தம்பி அபிஷன் ஜீவிந்த். கோலிவுட்டிற்கு உங்களை வரவேற்கிறேன். இந்த உலகம் உன்னுடையது!" என்று இசையமைப்பாளர் ஷான் ரோல்டன் தனது இன்ஸ்டாகிராம் பக்கத்தில் இயக்குநர் அபிஷன் ஜீவிந்த்தை வாழ்த்தி பதிவிட்டுள்ளார்.

ஷான் ரோல்டன் 'டூரிஸ்ட் பேமிலி' படத்துக்கு இசையமைத்திருந்தார் என்பது குறிப்பிடத்தக்கது.