டி20 கிரிக்கெட்: பாகிஸ்தானுக்கு எதிராக வரலாற்று சாதனை படைத்த ஆஸ்திரேலியா

ஹோபர்ட்,

ஆஸ்திரேலியாவில் சுற்றுப்பயணம் மேற்கொண்ட பாகிஸ்தான் கிரிக்கெட் அணி 3 போட்டிகள் கொண்ட டி20 தொடரில் விளையாடியது. இதில் முதல் இரு ஆட்டங்களிலும் ஜோஷ் இங்லிஸ் தலைமையிலான ஆஸ்திரேலியா வெற்றி பெற்று தொடரை கைப்பற்றி விட்டது. இந்த நிலையில் இவ்விரு அணிகள் இடையிலான 3-வது மற்றும் கடைசி 20 ஓவர் போட்டி ஹோபர்ட்டில் இன்று நடைபெற்றது.

இதில் டாஸ் வென்று முதலில் பேட்டிங் செய்த பாகிஸ்தான் அணி, ஆஸ்திரேலிய பந்துவீச்சை சமாளிக்க முடியாமல் 18.1 ஓவர்களில் 117 ரன்களில் சுருண்டது. அதிகபட்சமாக பாபர் அசாம் 41 ரன்கள் அடிக்க, ஆஸ்திரேலிய தரப்பில் ஆரோன் ஹார்டி 3 விக்கெட்டுகள் வீழ்த்தினார்.

இதனையடுத்து 118 ரன்கள் அடித்தால் வெற்றி என்ற எளிய இலக்கை நோக்கி களமிறங்கிய ஆஸ்திரேலிய அணி வெறும் 11.2 ஓவர்களில் 118 ரன்கள் அடித்து வெற்றி பெற்றது. அதிகபட்சமா மார்கஸ் ஸ்டோய்னிஸ் 27 பந்துகளில் 61 ரன்கள் குவித்தார்.

இந்த வெற்றியின் மூலம் 3 போட்டிகள் கொண்ட டி20 தொடரை ஆஸ்திரேலியா முழுமையாக கைப்பற்றி பாகிஸ்தானை ஒயிட்வாஷ் செய்தது.

பாகிஸ்தானுக்கு எதிராக ஆஸ்திரேலியா தொடர்ச்சியாக பெற்ற 7-வது வெற்றி இதுவாகும். இதன் மூலம் டி20 கிரிக்கெட் வரலாற்றில் பாகிஸ்தானுக்கு எதிராக தொடர்ச்சியாக அதிக வெற்றிகளை பெற்ற அணி என்ற மாபெரும் சாதனையை ஆஸ்திரேலியா படைத்துள்ளது. இதற்கு முன்னர் நியூசிலாந்து 6 வெற்றிகளை பதிவு செய்திருந்ததே அதிகபட்சமாக இருந்தது.

அந்த பட்டியல்:

1. ஆஸ்திரேலியா - 7 வெற்றிகள்

2. நியூசிலாந்து - 6 வெற்றிகள்

3. இலங்கை, இங்கிலாந்து - 5 வெற்றிகள்