டாஸ்மாக்கில் அமலாக்கத்துறை சோதனையை எதிர்த்த வழக்கு: வேறு நீதிபதிகள் அமர்வுக்கு மாற்ற கோரி ஐகோர்ட்டில் முறையீடு

சென்னை: அமலாக்கத்துறை சோதனைக்கு எதிராக டாஸ்மாக் மற்றும் தமிழக அரசு தாக்கல் செய்த வழக்குகளின் விசாரணையை வேறு அமர்வுக்கு மாற்ற கோரி சென்னை உயர்நீதிமன்ற தலைமை நீதிபதி அமர்வில் முறையீடு செய்யப்பட்டுள்ளது. டாஸ்மாக் தலைமை அலுவலகத்தில் அமலாக்கத்துறை நடத்திய சோதனையை சட்ட விரோதமானது என அறிவிக்க கோரியும், விசாரணை என்ற பெயரில் அதிகாரிகளை துன்புறுத்த தடை கோரியும் தமிழக அரசும், டாஸ்மாக் நிர்வாகமும் சென்னை உயர் நீதிமன்றத்தில் வழக்கு தொடர்ந்திருந்தன. இந்த வழக்கை விசாரித்த நீதிபதிகள் எம்.எஸ்.ரமேஷ் மற்றும் என். செந்தில்குமார் அடங்கி அமர்வு, விசாரணையில் இருந்து விலகியதை அடுத்து, வழக்கை நீதிபதிகள் எஸ்எம்.சுப்பிரமணியம் மற்றும் கே.ராஜசேகர் அடங்கிய அமர்வு விசாரித்தது.

இந்த வழக்கில் அமலாக்கத்துறை தாக்கல் செய்துள்ள பதில் மனுவுக்கு பதில் அளிக்க தமிழக அரசுக்கு அவகாசம் வழங்கிய நீதிபதிகள், விசாரணையை ஏப்ரல் 8ம் தேதிக்கு தள்ளி வைத்திருந்தனர். இந்நிலையில், நீதிபதி எஸ்.எம்.சுப்பிரமணியம் தலைமையிலான அமர்வில் இடம் பெற்றிருக்கும் நீதிபதி கே. ராஜசேகர், அமைச்சர் செந்தில் பாலாஜி தரப்பில் ஆஜராகும் வழக்கறிஞரின் சகோதரர் என்பதால், தமிழக அரசு தாக்கல் செய்த வழக்கின் விசாரணையை வேறு அமர்வுக்கு மாற்ற வேண்டும் என்று மூத்த வழக்கறிஞர் கே.எம். விஜயன், தலைமை நீதிபதி கே.ஆர்.ஸ்ரீராம் தலைமையிலான அமர்வில் இன்று முறையீடு செய்தார்.

இதைக்கேட்ட தலைமை நீதிபதி அமர்வு, இது சம்பந்தமாக நீதிபதி எஸ்.எம்.சுப்பிரமணியம் தலைமையிலான அமர்வில் முறையிடுங்கள். அந்த அமர்வு எடுக்கும் முடிவின் அடிப்படையில் நிர்வாக உத்தரவுகள் பிறப்பிக்கப்படும் என்று தெரிவித்தனர்.

The post டாஸ்மாக்கில் அமலாக்கத்துறை சோதனையை எதிர்த்த வழக்கு: வேறு நீதிபதிகள் அமர்வுக்கு மாற்ற கோரி ஐகோர்ட்டில் முறையீடு appeared first on Dinakaran.