ஜூனியர் மகளிர் டி20 உலகக்கோப்பை தொடர் நாளை தொடக்கம்

புதுடெல்லி,

கடந்த 2023ம் ஆண்டு தென் ஆப்பிரிக்காவில் நடைபெற்ற முதலாவது ஜூனியர் (19 வயதுக்கு உட்பட்டோ) மகளிர் டி20 உலகக்கோப்பை கிரிக்கெட் தொடரில் இந்திய அணி சாம்பியன் பட்டம் வென்றிருந்தது. இந்நிலையில், 2வது ஜூனியர் மகளிர் டி20 உலகக்கோப்பை தொடர் மலேசியாவில் நாளை தொடங்குகிறது. இந்த தொடரில் மொத்தம் 16 அணிகள் கலந்து கொள்கின்றன. பிப்ரவரி 2ம் தேதி நடைபெற உள்ள இந்த தொடரில் இந்திய அணி குரூப் ஏ-வில் இடம் பெற்றுள்ளது. இந்த பிரிவில் மலேசியா, இலங்கை, வெஸ்ட் இண்டீஸ் அணிகள் இடம் பிடித்துள்ளன.

நாளை மொத்தமாக 6 லீக் ஆட்டங்கள் நடைபெறுகிறது. நாளை நடைபெறும் முதல் ஆட்டத்தில் ஆஸ்திரேலியா - ஸ்காட்லாந்து அணிகள் மோத உள்ளன. மற்ற லீக் ஆட்டங்களில் இங்கிலாந்து - அயர்லாந்து, சமோவா - நைஜீரியா, வங்காளதேசம் - நேபாளம், பாகிஸ்தான் - அமெரிக்கா, நியூசிலாந்து - தென் ஆப்பிரிக்கா அணிகள் மோத உள்ளன.

இந்திய அணி தனது தொடக்க லீக் ஆட்டத்தில் வரும் 19ம் தேதி வெஸ்ட் இண்டீஸை எதிர்கொள்கிறது. இந்திய அணி சாம்பியன் பட்டத்தை தக்க வைக்க கடுமையாக போராடும். மற்ற அணிகள் முதல் முறையாக சாம்பியன் பட்டம் வெல்ல கடுமையாக போராடும்.

இந்த தொடருக்கான இந்திய அணிக்கு நிகி பிரசாத் கேப்டனாகவும், சானிகா சால்கே துணை கேப்டனாகவும் நியமிக்கப்பட்டுள்ளனர். விக்கெட் கீப்பர்களாக ஜி கமலினி மற்றும் பவிகா அஹிரே ஆகியோர் தேர்வு செய்யப்பட்டுள்ளனர்.

இந்திய அணி விவரம்: நிகி பிரசாத் (கேப்டன்), சானிகா சால்கே (துணை கேப்டன்), ஜி திரிஷா, கமலினி ஜி (விக்கெட் கீப்பர்), பவிகா அஹிரே (விக்கெட் கீப்பர்), ஈஸ்வரி அவசரே, மிதிலா வினோத், ஜோஷிதா வி ஜே, சோனம் யாதவ், பருணிகா சிசோடியா, கேசரி த்ரிதி, ஆயுஷி சுக்லா, ஆனந்திதா கிஷோர், எம்.டி.ஷப்னம், வைஷ்ணவி எஸ்.

ரிசர்வ் வீரர்கள்: நந்தனா எஸ், ஐரா ஜே, அனாதி டி

இந்திய அணியின் போட்டி அட்டவணை:

இந்தியா - வெஸ்ட் இண்டீஸ் - ஜனவரி 19

இந்தியா - மலேசியா - ஜனவரி 21

இந்தியா - இலங்கை - ஜனவரி 23