ஜூனியர் மகளிர் ஆசிய கோப்பை ஹாக்கி மலேஷியாவை பந்தாடிய இந்தியா: 5-0 கோல் கணக்கில் வெற்றி

மஸ்கட்: ஆசிய கோப்பைக்கான ஜூனியர் மகளிர் ஹாக்கிப் போட்டியில் மலேஷியாவை இந்திய அணி 5-0 கோல் கணக்கில் அபாரமாக வென்றுள்ளது. ஆசிய கோப்பைக்காக ஜூனியர் மகளிர் ஹாக்கிப் போட்டிகள் மஸ்கட்டில் நடந்து வருகின்றன. கடந்த வாரம் நடந்த வங்கதேசத்துக்கு எதிரான ஏ பிரிவு போட்டியில் 13-1 என்ற கோல் கணக்கில் வென்று சாதனை படைத்திருந்த நடப்பு சாம்பியன் இந்தியா நேற்று முன்தினம் நடந்த போட்டியில் மலேஷியாவை எதிர்கொண்டது.

துவக்கத்தில் இந்திய வீராங்கனைகள் மந்தமாக ஆடினாலும் போகப்போக ஆக்ரோஷத்தை வெளிப்படுத்தத் துவங்கினர். போட்டி முடிவில் 5-0 கோல் கணக்கில் மலேஷியாவை அபாரமாக இந்தியா வென்றது. இந்திய வீராங்கனை தீபிகா ஆட்டத்தின் 37, 39, 48வது நிமிடங்களில் 3 கோல்களை அடித்து அசத்தினார். தவிர, 32வது நிமிடத்தில் வைஷ்ணவி பால்கே, 38வது நிமிடத்தில் கனிகா சிவாச் தலா ஒரு கோல் அடித்தனர். மலேஷியா அணியுடன் கடைசியாக மோாதிய 3 போட்டிகளிலும் இந்திய அணியே வெற்றி பெற்றுள்ளது. கடந்த 2015ல் நடந்த போட்டியில் 9-1 என்ற கோல் கணக்கிலும், 2023ல் நடந்த போட்டியில் 2-1 என்ற கோல் கணக்கிலும் மலேஷியாவை இந்தியா வென்றுள்ளது.

The post ஜூனியர் மகளிர் ஆசிய கோப்பை ஹாக்கி மலேஷியாவை பந்தாடிய இந்தியா: 5-0 கோல் கணக்கில் வெற்றி appeared first on Dinakaran.