ஜம்மு காஷ்மீர் பஹல்காமில் தாக்குதல் நடத்திய தீவிரவாதியின் புகைப்படம் வெளியீடு..!!

ஜம்மு காஷ்மீர்: ஜம்மு காஷ்மீர் பஹல்காமில் தாக்குதல் நடத்திய தீவிரவாதியின் புகைப்படம் வெளியிடப்பட்டுள்ளது. தெற்கு காஷ்மீரின் அனந்த்நாக் மாவட்டத்தில் உள்ள பஹல்காமின் மேல் பகுதியில் சுற்றுலாப் பயணிகள் மீது நேற்று தீவிரவாதிகள் துப்பாக்கிச்சூடு நடத்தினர். இந்தச் சம்பவம் பைசரன் எனப்படும் பிரபலமான புல்வெளியில் நடைபெற்றதாகவும், அங்கு சுற்றுலா வந்திருந்தவர்களே இலக்காக தேர்ந்தெடுக்கப்பட்டதாகவும் கூறப்படுகிறது. இந்த துப்பாக்கி சூட்டில் சுற்றுலா பயணிகள் 28 பேர் உயிரிழந்தனர். 13 பேர் காயமடைந்துள்ளனர். காயமடைந்தவர்களில் சிலர் கடும் உயிர் ஆபத்துடன் சிகிச்சை பெற்றுவருவதாகவும் கூறப்பட்டுள்ளது. உயிரிழந்தவர்களில் தமிழ்நாடு, கர்நாடகா, குஜராத் மற்றும் மகாராஷ்டிரா மாநிலங்களை சேர்ந்தவர்களும் உள்ளதாக கூறப்படுகிறது.

ஜம்மு காஷ்மீர் தாக்குதல்: தீவிரவாதியின் புகைப்படம் வெளியீடு

தாக்குதல் நடத்தியவர்கள் மற்றும் அவர்களின் நோக்கங்கள் பற்றிய கூடுதல் தகவல்களைக் கண்டறிய பாதுகாப்புப் படையினர் தீவிரமாக செயல்பட்டு வரும் நிலையில், பஹல்காமில் சுற்றுலா பயணிகள் மீது தாக்குதல் நடத்திய பயங்கரவாதியின் முதல் புகைப்படம் வெளியாகியுள்ளது. தீவிரவாதியின் புகைப்படம் சுற்றுலா பயணி ஒருவரின் செல்போனில் பதிவாகி இருந்ததாக தகவல் வெளியாகியது. துப்பாக்கியுடன் தீவிரவாதி நின்று கொண்டிருக்கும் காட்சி வெளியாகி உள்ளது. இந்தப் புகைப்படம் நேற்று இரவு 1 மணி முதல் 2 மணி வரை ஜம்மு காஷ்மீர் காவல்துறை, சிஆர்பிஎஃப் மற்றும் ராணுவத்தினரிடம் பகிரப்பட்டது. இந்த அமைப்பு மற்றும் தோற்றத்துடன் பொருந்தக்கூடிய எந்தவொரு சந்தேக நபர்களையும் உன்னிப்பாகக் கண்காணித்து விசாரிக்கவும், அதற்கேற்ப பொருத்தமான தகவல்களைச் சேகரிக்கவும் அதிகாரிகளுக்கு அறிவுறுத்தப்பட்டுள்ளது.

பஹல்காமில் 5 பயங்கரவாதிகள் பதுங்கல்?

ஜம்மு காஷ்மீர் பஹல்காமில் 4 முதல் 5 பயங்கரவாதிகள் பதுங்கி உள்ளதாக தகவல் வெளியாகி உள்ளது. மலைப்பகுதியில் பயங்கரவாதிகள் பதுங்கியிருக்க வாய்ப்பு உள்ளதால் ஹெலிகாப்டர் உதவியுடன் தேடுதல் வேட்டை நடைபெற்று வருகிறது.

காஷ்மீர்: தீவிரவாதிகளை தேடிவரும் பாதுகாப்பு படையினர்

காஷ்மீர் மாநிலம் பாரமுல்லாவில் ஊடுருவ முயன்ற 2 தீவிரவாதிகளை பாதுகாப்பு படையினர் தேடி வருகின்றனர். பயங்கர ஆயுதங்கள், வெடிபொருட்களை அவர்களிடம் இருப்பதாகவும் தகவல் வெளியாகியுள்ளது.

ஸ்ரீநகரில் சந்தேகத்துக்கு இடமான பைக் சிக்கியது

காஷ்மீரில் தீவிரவாதிகள் தாக்குதல் நடந்த நிலையில் நம்பர் பிளேட் இல்லாத இருசக்கர வாகனம் ஸ்ரீநகரில் சிக்கியது.

The post ஜம்மு காஷ்மீர் பஹல்காமில் தாக்குதல் நடத்திய தீவிரவாதியின் புகைப்படம் வெளியீடு..!! appeared first on Dinakaran.