சென்னை மெரினா கடற்கரையில் கடல் அலையை மிஞ்சும் மக்கள் அலை

சென்னை,

இந்திய விமானப்படையின் 92வது ஆண்டையொட்டி சென்னை மெரினாவில், இன்று (அக்.,06) விமானப்படையின் சாகச நிகழ்ச்சிகள் நடைபெற்றது.இந்திய விமானப்படை நிறுவன தினம் அக்., 8ல் கொண்டாடப்படுகிறது.

இதையொட்டி, நாட்டின் பல்வேறு விமானப்படை நிலையங்களில், அணிவகுப்பு ஏற்பாடு தயாராகி வருகிறது. முதல் முறையாக தமிழகத்தில், பிரமாண்ட 'ஏர் ஷோ' இன்று (அக்.,06) காலை 11 மணிக்கு சென்னை, மெரினாவில் துவங்கியது.முதலாவதாக, ஆகாஷ் கங்கா குழுவினர், 2000 அடி உயரத்தில் இருந்து பாராசூட்டில் குதித்து பார்வையாளர்களை உற்சாகப்படுத்தினர்.

தொடர்ந்து எம்.ஐ.,17 ஹெ லிகாப்டர்களின் சாகச நிகழ்ச்சி நடந்தது. சுகோய்-30 எம்.கே.ஐ., ரபேல், மிராஜ் 2000, மிக்-29 மற்றும் உள்நாட்டிலேயே தயாரிக்கப்பட்ட தேஜஸ் போன்ற போர் விமானங்கள் சாகச நிகழ்ச்சிகள் மக்களை வெகுவாக கவர்ந்தது. போக்குவரத்துக்கு பயன்படுத்தப்படும் எம்.ஐ-17 மற்றும் பிரசாந்த் எல்சிஎச் (இலகுவான போர் ஹெலிகாப்டர்) போன்ற ஹெலிகாப்டர்கள், டகோட்டா மற்றும் ஹார்வர்ட் போன்ற பாரம்பரிய விமானங்களும் சாகச நிகழ்ச்சியில் பங்கேற்றன.

பிரெஞ்சு விமான நிறுவனத்தின் தயாரிப்பான சேத்தக் ஹெலிகாப்டர்கள் வானில் வலம் வந்தன. மூவர்ண தேசியக்கொடியை பறக்கவிட்டப்படி வானை அதிர வைத்தது சேத்தக் ஹெலிகாப்டர்கள். தஞ்சையில் இருந்து புறப்பட்ட ரபேல் விமானங்கள் சென்னை மெரினா கடற்கரையை வலம் வந்தன. இடிமுழுக்கத்துடன் ரபேல் விமானங்கள் பறக்க பறக்க கடற்கரையில் கூடியிருந்ஹ மக்கள் ஆரவாரம் செய்து உற்சாகப்படுத்தினர். இந்திய விமானப்படையின் பழமையான டகோடா விமானங்கள் வானை வலம் வந்து சாகசம் புரிந்தன.

வானில் இருந்து போர் புரியும் திறன் உள்ள மிக் 29 ரக விமானங்கள் வானில் சீறிப்பாய்ந்து மிரளச்செய்தன. 2 ஆயிரம் கி.மீ தூரம் செல்லக்கூடிய சி295 விமானம் மெரினா வான் பரப்பில் சாகத்தில் ஈடுபட்டு சிலிர்க்க வைத்தது. கடலோரப்படையின் பி81 ரக விமானங்கள் மெரினா கடற்கரையில் சாகசம் புரிந்து மக்களை மெய்சிலிர்க்கச்செய்தன. சிறிய இலகுரக சூப்பர் சோனிக் விமானமான தேஜஸ் விமானங்கள் வானை வட்டமடித்து சாகசம் செய்தன. அனைத்து வானிலை தருணங்களிலும் போர் புரியக்கூடிய சுகோய் 30 எம்.கே.ஐ. ரக விமானம் பாய்ந்து சாகசம் புரிந்தன. சிறிய இலகுரக சூப்பர் சோனிக் விமானமான தேஜஸ் விமானங்கள் வானை வட்டமடித்து சாகசம் செய்தன. தேஜஸ் விமானங்களும் சீறிப்பாந்து மெரினா கடற்கரையை அதிர வைத்து ஆச்சரியப்படுத்தின. மேம்படுத்தப்பட்ட நவீன வசதிகள் கொண்ட ஜாகுவார் விமானங்கள் விண்ணில் வலம் வந்து சாகசம் செய்தன.

சாகச நிகழ்ச்சியை காண மெரினா கடற்கரையில் மக்கள் கூட்டம் அலைமோதியது. கடற்கரையில் கடல் அலையை விட மிஞ்சும் மக்கள் அலை உள்ளது. கடற்கரையில் குடை பிடித்தவாறு மக்கள் நீண்ட வரிசையில் காத்திருந்து, வானில் நிகழ்ந்த சாகச நிகழ்ச்சிகளை ஆர்வமுடன் பார்த்து பார்த்து ரசித்து வருகின்றனர். வான் சாகச நிகழ்ச்சி நடைபெறும் மெரினாவில் கூட்ட நெரிசலில் சிக்கி பலர் மயக்கமடைந்ததாக தகவல் வெளியாகி உள்ளது.

லட்சக்கணக்கான பொதுமக்கள், சென்னை மெரினாவில் நடைபெற்று வரும் விமானப்படை வான் சாகச நிகழ்ச்சியக் காண சென்னை கடற்கரையை நோக்கி படையெடுத்த நிலையில், சென்னை அண்ணா சாலை, வாலாஜா சாலை, அடையாறு மேம்பாலம் அருகில் உள்ளிட்ட பகுதிகளில் கடும் போக்குவரத்து நெரிசல் ஏற்பட்டுள்ளது. ஏராளமான வாகனங்கள் சாலைகளில் அணிவகுத்து நிற்கின்றன.