சிரியா மீது இஸ்ரேல் தாக்குதல்; 36 பேர் பலி

டமாஸ்கஸ்: சிரியா மீது இஸ்ரேல் நடத்திய வான்வழி தாக்குதலில் 36 பேர் கொல்லப்பட்டனர். இதனால் தொடர்ந்து பதற்றம் நீடித்து வருகிறது. காசாவை ஹமாஸ் ஆயுத குழுவினர் நிர்வகித்து வருகின்றனர். இந்த குழுவினர், கடந்தாண்டு அக்டோபர் 7ம் தேதி இஸ்ரேலுக்குள் புகுந்து சரமாரியாக தாக்குதல் நடத்தினர். இதில் 1,139 இஸ்ரேலியர்கள் கொல்லப்பட்டனர். மேலும், இஸ்ரேலில் இருந்து 251 பேரை பணய கைதிகளாக காசா முனைக்கு ஹமாஸ் கடத்தி சென்றது.

இதையடுத்து ஹமாஸ் ஆயுத குழு மீது போர் அறிவித்த இஸ்ரேல், 117 பணய கைதிகளை உயிருடன் மீட்டுள்ளது. அதேபோல், ஹமாஸ் ஆயுத குழுவினர்களால் கடத்தப்பட்டு கொல்லப்பட்ட பணய கைதிகளின் உடல்களும் மீட்கப்பட்டுள்ளன. ஆனால், 101 இஸ்ரேலியர்கள், ஹமாஸ் வசம் பணய கைதிகளாக உள்ளனர் என இஸ்ரேல் தெரிவித்துள்ளது. இதில், பலர் உயிரிழந்திருக்கலாம் எனவும் தகவல் வெளியாகியிருந்தது. அதேவேளையில் இந்த போரில் காசாவில் ஹமாஸ் ஆயுத குழுவினர் உள்பட 43 ஆயிரத்துக்கும் மேற்பட்டோர் உயிரிழந்துள்ளனர். அதேபோல், மேற்குகரையில் 700க்கும் மேற்பட்டோர் உயிரிழந்துள்ளனர்.

இதனிடையே, இஸ்ரேல் – ஹமாஸ் போர் ஓராண்டை கடந்து நீடித்து வருகிறது. இந்த போரில் ஹமாசுக்கு ஆதரவாக லெபனானில் செயல்பட்டு வரும் ஹிஸ்புல்லா அமைப்பினர், ஏமனில் செயல்பட்டு வரும் ஹவுதி கிளர்ச்சியாளர்கள், சிரியாவில் செயல்பட்டு வரும் பயங்கரவாத குழுக்கள் இஸ்ரேல் மீது அடிக்கடி தாக்குதல் நடத்தி வருகின்றன. இதற்கு இஸ்ரேல் பதிலடி கொடுத்து வருகிறது. இந்நிலையில், சிரியா மீது இஸ்ரேல் வான்வழி தாக்குதல் நடத்தியது. சிரியாவின் பல்ரிம்யா பகுதியில் நடத்தப்பட்ட இந்த தாக்குதலில் 36 பேர் உயிரிழந்தனர். 50 பேர் காயமடைந்தனர். இந்த தாக்குதல் சிரியாவில் செயல்பட்டு வரும் ஈரான் ஆதரவு கிளர்ச்சியாளர்களை குறிவைத்து நடத்தப்பட்டதாக தகவல் வெளியாகியுள்ளது.

The post சிரியா மீது இஸ்ரேல் தாக்குதல்; 36 பேர் பலி appeared first on Dinakaran.