கொடைக்கானலில் பனிமூட்டம், சாரல் மழை: விடுமுறை நிறைவால் பிரியாவிடை பெற்ற சுற்றுலா பயணிகள்

கொடைக்கானல்: கொடைக்கானலில் பனி மூட்டத்துடன் சாரல் மழையும் பெய்து இன்று ரம்மியமான சூழ்நிலை காணப்பட்டது. இருப்பினும் தொடர் விடுமுறை முடிந்ததால் சுற்றுலா பயணிகள் வெளியேறத் தொடங்கினர்.

திண்டுக்கல் மாவட்டம் கொடைக்கானலுக்கு பொங்கல் பண்டிகை தொடர் விடுமுறையால் கடந்த ஒரு வாரமாக சுற்றுலா பயணிகள் வருகை தொடர்ந்து அதிகரித்து காணப்பட்டது. சிலர் அறைகள் எடுத்து இரண்டு, மூன்று நாட்கள் தங்கியும் சுற்றுலா தலங்களுக்கு சென்று வந்தனர். இதனால் கொடைக்கானலில் கடந்த சில தினங்களாக வாகன நெரிசல் காணப்பட்டது. கடந்த ஆண்டு பருவமழை வழக்கத்தை விட அதிகம் பெய்ததால் கொடைக்கானல் மலைப்பகுதிகள் கூடுதல் பசுமையாக காணப்படுவது சுற்றுலா பயணிகளை மிகவும் கவர்ந்துள்ளது.