கூட்டமா வாங்க... சேரோட போங்க! - நூதன முறையில் பொதுக் கூட்டத்துக்கு ஆள் சேர்த்த திருப்பூர் அதிமுக

இப்போதெல்லாம் அரசியல் கட்சி நிகழ்ச்சிகளுக்கு கூட்டம் சேர்ப்பதற்குள் கட்சிக்காரர்களுக்கு தாவு தீர்ந்துவிடுகிறது. காசு கொடுத்து கூட்டி வந்தாலும் ‘கொள்கை பிடிப்பில்லாததால்(!)’ பாதியிலேயே வண்டியைக் கிளப்பிவிடுகிறார்கள். இதைப் புரிந்து கொண்டு திருப்பூர் அதிமுகவினர் அட்டகாசமான ஒரு உத்தியை அரசியல் உலகத்துக்கு அறிமுகப்படுத்தி இருக்கிறார்கள்.

திருப்பூர் பெருமாநல்லூரில் கடந்த ஞாயிற்றுக் கிழமை திருப்பூர் மாநகர் மாவட்ட எம்ஜிஆர் இளைஞர் அணி செயலாளர் வேல்குமார் சாமிநாதன் ஏற்பாட்டில் அதிமுக-வின் 53-ம் ஆண்டு விழா பொதுக்கூட்டம் நடந்தது. மக்களை ஈர்க்கும் முக்கிய தலைவர்கள் கலந்து கொள்ளும் கூட்டங்களில் கூட கூட்டத்தினர் அங்கொருவரும் இங்கொருவருமாக அலை பாய்ந்தபடியே இருப்பார்கள்.