கின்னஸ் சாதனையால் முதலாளியான மாணவி!

அசாமில் நடன நிகழ்ச்சி மூலம் கின்னஸ் சாதனை புத்தகத்தில் இடம்பெற்ற பெண் டீக்கடை நடத்தி வருவது பாராட்டுகளை குவித்து வருகிறது. அசாம் மாநிலம் கவுகாத்தியில் உள்ள சாருஜாய் அரங்கத்தில் 2023 கின்னஸ் சாதனைக்கான பிஹூ நடன நிகழ்ச்சி நடைபெற்றது. இதில் ஹேமபிரபா பிஸ்வாஸ் என்ற பெண் 11,298 நடன கலைஞர்களுடன் பங்கேற்று உலக சாதனை புத்தகத்தில் இடம்பெற்று அசத்தினார். இதையடுத்து அவருக்கு ரொக்கப் பணம் பரிசாக வழங்கப்பட்டது. ஹேமபிரபா பிஸ்வாஸ் தனக்கு பரிசாக கிடைத்த பணத்தை வைத்து நாகோன் மாவட்டம் ஜகலபண்டாவில் ஒரு தேநீர் கடையைத் திறந்துள்ளார். அவரது செயலுக்கு பொதுமக்கள் உள்பட பலரும் பாராட்டுகளையும், வாழ்த்துகளையும் தெரிவித்து வருகின்றனர். இந்நிலையில் அசாம் முதல்வர் ஹிமந்த பிஸ்வா சர்மா தன் ட்விட்டர் பதிவில், ஹேமபிரபாவின் தேநீர் கடைக்கு சென்று தேநீர் பருகி விட்டு ஹேமபிரபாவுடன் உரையாடும் காட்சிகளை வௌியிட்டுள்ளார்.

யார் இந்த ஹேமபிரபா பிஸ்வாஸ்?

அசாம் மாநிலம் கவுகாத்தியைச் சேர்ந்த கல்லூரி மாணவிதான் ஹேமபிரபா பிஸ்வாஸ். பொருளாதாரத்தால் பின் தங்கிய ஹேமபிரபாவின் அப்பா தினக் கூலித் தொழிலாளி. அவருக்குக் கிடைக்கும் சொற்ப வருமானத்தில் மகளின் படிப்பை தொடர வைப்பது தினந்தோறும் அவருக்குக் கடினமாக இருந்தது. இந்நிலையில் ஏப்ரல் மாதம் 2023ஆம் ஆண்டு கின்னஸ் சாதனைக்காக பிஹு நடனம் எனப்படும் அசாம் மக்களின் பாரம்பரிய நடன நிகழ்வை உலகிலேயே அதிகமான நடனக் கலைஞர்கள் ஆடும் நிகழ்வாக நடத்தி கின்னஸ் சாதனை பட்டியலில் இடம் பிடித்தனர் கவுகாத்தி மக்கள். இந்த நடன நிகழ்வில் 11,298 பேர் நடனம் ஆடிய நிகழ்வில் ஒருவராகக் கலந்துகொண்டு நடனமாடினார் ஹேமபிரபா. இந்த நிகழ்வில் அசாம் முதலமைச்சர் ஹிமந்த பிஸ்வா ஷர்மாவும் கலந்துகொண்டு வெற்றி பெற்றவர்களை வாழ்த்தி பரிசளித்தார். இதில் ஒரு குறிப்பிட்ட தொகையும் பரிசாக சாதித்த மக்களுக்குக் கொடுக்கப்பட்டது. அதைக் கொண்டு ஆரம்பத்தில் ஒரு இருசக்கர வாகனம் வாங்கலாம் என நினைத்தார் ஹேமபிரபா. பின்னர் தனது கல்லூரிப் படிப்பை மனதில் கொண்டு அதற்கான செலவுக்கான பணம் தேவை என்பதால் கிடைத்த பரிசுத் தொகையை மூலதனமாகக் கொண்டு ஒரு டீக்கடை திறந்திருக்கிறார். இந்த டீ ஸ்டால் செய்தி தெரிந்து அசாம் முதலமைச்சரே நேரில் ஹேமாவை பாராட்டி அவரது கடையில் டீ குடித்திருக்கிறார்.‘படிப்பிற்காக பணம் தேவை, அதற்காக ஒரு சொந்தத் தொழில் என புத்திசாதுர்யமாக யோசித்த ஹேமபிரபா இளைஞர்களின் எடுத்துக்காட்டாக திகழ்கிறார். அவரின் கடைக்காகவும் மற்றும் படிப்புக்காகவும் என அரசு சார்பில் எவ்வித உதவிகள் எல்லாம் செய்ய முடியுமோ அவை எல்லாம் கூடியவிரைவில் செய்யப்படும்’ என அசாம் முதலமைச்சர் ஹிமந்த பிஸ்வா ஷர்மா தெரிவித்திருக்கிறார்.
– நிஷா

The post கின்னஸ் சாதனையால் முதலாளியான மாணவி! appeared first on Dinakaran.