காதலி, தாய் சரமாரி குத்திக்கொலை: வாலிபர் வெறிச்செயல்

திருமலை: காதலை கைவிட்டதால் காதலி மற்றும் அவரது தாயை வீடு புகுந்து சரமாரி குத்திக்கொன்ற வாலிபரை போலீசார் கைது செய்தனர். ஆந்திர மாநிலம் விசாகப்பட்டினம் மதுரவாடா சுயம்கிருஷி நகரை சேர்ந்தவர் லட்சுமி (43). இவரது மகள் தீபிகா (20). பட்டதாரியான இவர், படிப்பை முடித்துவிட்டு வீட்டில் இருந்து வந்தார். ஸ்ரீகாகுளத்தை சேர்ந்தவர் நவீன் (26). தீபிகாவும், நவீனும் காதலித்து வந்தனர். இவர்களது காதல் விவகாரம் தீபிகாவின் பெற்றோருக்கு தெரிய வந்தது. இதையடுத்து இருவருக்கும் திருமணம் செய்துவைக்க இருவீட்டாரும் சம்மதம் ெதரிவித்துள்ளனர். இந்நிலையில் சில மாதங்களாக நவீன் கஞ்சா போதைக்கு அடிமையானாராம். இதையறிந்த தீபிகா, நவீனுடன் பழகுவதை நிறுத்திக்கொண்டார். ஆனால் நவீன் அடிக்கடி தீபிகாவின் வீட்டுக்கு சென்று பேச முயன்றார். தீபிகா அவரை கண்டுகொள்ளவில்லை.

இதையடுத்து சில நாட்களுக்கு முன் மீண்டும் தீபிகா வீட்டுக்கு வந்த நவீன், ஏன் என்னிடம் பேச மறுக்கிறாய். நாம் விரைவில் திருமணம் செய்து கொள்ளலாம் என்று கூறியுள்ளார். இதைக்கேட்ட தீபிகா `கஞ்சா பழக்கத்திற்கு அடிமையான உன்னை திருமணம் செய்யும் எண்ணம் எப்போதோ போய்விட்டது. நீ வேறு யாரையாவது திருமணம் செய்துகொள்’ எனக்கூறியுள்ளார். தீபிகாவுக்கு ஆதரவாக அவரது தாய் லட்சுமியும் பேசியுள்ளார். இதனால் கடும் ஆத்திரத்துடன் நவீன் சென்றுவிட்டார். நேற்று மீண்டும் தீபிகாவின் வீட்டுக்கு வந்த நவீன், திருமணம் குறித்து பேசினார். அப்போது இருவருக்கும் வாக்குவாதம் ஏற்பட்டது. இதில் ஆத்திரமடைந்த நவீன், தான் மறைத்து வைத்திருந்த கத்தியை எடுத்து தீபிகாவை குத்த முயன்றார். இதைக்கண்டு அதிர்ச்சியடைந்த தாய் லட்சுமி, நவீனை தடுத்துள்ளார். அப்போது நவீன், லட்சுமியை சரமாரி கத்தியால் குத்தியுள்ளார்.

மேலும் தீபிகாவையும் குத்தினார். இவர்களது அலறல் சத்தம் கேட்ட அக்கம் பக்கத்தினர் ஓடிவந்தனர். ஆனால் அதற்குள் நவீன் தப்பியோடிவிட்டார். கத்திக்குத்தில் காயமடைந்த தாய், மகள் இருவரும் ரத்த வௌ்ளத்தில் மயங்கி விழுந்தனர். இதுகுறித்து தகவலறிந்த போலீசார் விரைந்து வந்து தாய், மகள் இருவரையும் மீட்டு அங்குள்ள மருத்துவமனைக்கு அனுப்பி வைத்தனர். அங்கு பரிசோதித்த டாக்டர்கள், வழியிலேயே லட்சுமி இறந்துவிட்டதாக ெதரிவித்தனர். தீபிகாவுக்கு தீவிர சிகிச்சை அளித்தனர். இருப்பினும் அவரும் சில மணி நேரத்தில் இறந்துவிட்டார். இதுகுறித்து போலீசார் வழக்குப்பதிந்து ஸ்ரீகாகுளம் அருகே பதுங்கியிருந்த நவீனை நேற்றிரவு கைது செய்து விசாரித்து வருகின்றனர். திருமணம் செய்ய மறுத்த காதலி மற்றும் அவரது தாயை காதலன் கொன்ற சம்பவம் பரபரப்பை ஏற்படுத்தியது.

The post காதலி, தாய் சரமாரி குத்திக்கொலை: வாலிபர் வெறிச்செயல் appeared first on Dinakaran.