கனமழையால் பாதிக்கப்பட்ட மக்களுக்கு கோயில்கள் சார்பில் 5,000 உணவு பொட்டலங்கள் வழங்கல் - தமிழக அரசு

சென்னை: சென்னையில் கனமழையால் பாதிக்கப்பட்ட மக்களுக்கு இந்து சமய அறநிலையத் துறை ஆளுகைக்குட்பட்ட கோயில்கள் சார்பில் இன்று (அக்.16) 5,000-க்கும் மேற்பட்ட உணவுப் பொட்டலங்கள் தயாரித்து வழங்கப்பட்டன.

இது தொடர்பாக வெளியிடப்பட்டுள்ள செய்திக் குறிப்பு: வடகிழக்கு பருவமழை மற்றும் குறைந்த காற்றழுத்த தாழ்வு மண்டலம் காரணமாக சென்னையில் பெய்து வரும் கன மழையை தொடர்ந்து பாதிக்கப்பட்ட மக்களுக்கு அரசு, சென்னை மாநகராட்சி மற்றும் மக்கள் பிரதிநிதிகள் மூலம் தேவையான நிவாரண உதவிகள் வழங்கப்பட்டு வருகின்றன. சென்னை மண்டலங்களைச் சேர்ந்த கோயில்கள் சார்பில் இன்று (அக்.16) காலை முதல் உணவு பொட்டலங்கள் தயாரித்து பாதிக்கப்பட்ட மக்களுக்கு வழங்கப்பட்டு வருகின்றன.