'எஸ்கே 25' படத்தின் பாடல்கள் குறித்த அப்டேட் கொடுத்த ஜி.வி.பிரகாஷ்

சென்னை,

தமிழ் சினிமாவின் முன்னணி நடிகர்களில் ஒருவர் சிவகார்த்திகேயன். இவரது நடிப்பில் ராஜ்குமார் பெரியசாமி இயக்கத்தில் சமீபத்தில் வெளியான 'அமரன்' படம் வசூல் ரீதியாகவும் விமர்சனம் ரீதியாகவும் நல்ல வரவேற்பை பெற்றுள்ளது. இப்படம் சுமார் ரூ.400 கோடிக்கும் அதிகமாக வசூலித்துள்ளதாக கூறப்படுகிறது.

அதே சமயம் இவர் ஏ.ஆர். முருகதாஸ் இயக்கத்தில் தனது 23-வது திரைப்படத்தில் நடித்து முடித்துள்ளார். அடுத்ததாக சிபி சக்கரவர்த்தியின் இயக்கத்தில் 24-வது படத்தில் நடிக்க உள்ளார். இதற்கிடையில் இவர் 'சூரரைப் போற்று' படத்தை இயக்கிய சுதா கொங்கரா இயக்கத்தில் எஸ்கே 25 எனும் திரைப்படத்தில் நடிப்பதற்கு ஒப்பந்தமாகியுள்ளார்.

இப்படம் இந்தி திணிப்பு தொடர்பான கதைக்களத்தில் உருவாக இருப்பதாக கூறப்படுகிறது. இந்த படத்தில் ஜெயம் ரவி, ஸ்ரீலீலா மற்றும் அதர்வா ஆகியோர் முக்கிய கதாபாத்திரங்களில் நடிக்க உள்ளனர். இந்த படத்தை டான் பிக்சர்ஸ் நிறுவனம் தயாரிக்க ஜிவி பிரகாஷ் இசையமைக்க உள்ளார். இப்படத்தில் நடிகர் சிவகார்த்திகேயன் கல்லூரி மாணவராக நடிக்க உள்ளார்.

இந்த நிலையில் இப்படத்தில் இடம் பெற்றுள்ள பாடல்கள் குறித்த அப்டேட்டை இசையமைப்பாளர் ஜி.வி.பிரகாஷ் பகிர்ந்துள்ளார். அதாவது, சமீபத்திய பேட்டி ஒன்றில் பேசிய ஜி.வி.பிரகாஷ், "அமரன் படத்திற்கு பிறகு நானும் சிவகார்த்திகேயனும் மீண்டும் இணைகிறோம். சுதா கொங்கரா படத்தில் மீண்டும் பணியாற்றுவது எனக்கு மகிழ்ச்சி. அவரது படத்தில் தான் எனக்கு முதல் தேசிய விருது கிடைத்தது என்றார். மேலும் இப்படத்தில் 4 பாடல்களை பதிவு செய்து விட்டோம். அதில் 3 பாடல்கள் கண்டிப்பாக பிளாக்பஸ்டர் ஹிட் பாடல்களாக அமையும்" என்று கூறியுள்ளார்.