எஸ்.ஏ.20 ஓவர் லீக்: எம்.ஐ. கேப்டவுன் அணியை வீழ்த்திய பார்ல் ராயல்ஸ்

பார்ல்,

ஐ.பி.எல். கிரிக்கெட் பாணியில் தென் ஆப்பிரிக்காவில் 20 ஓவர் லீக் (எஸ்.ஏ.20 ஓவர் லீக்) கிரிக்கெட் போட்டி நடைபெற்று வருகிறது. இதில் மொத்தம் 6 அணிகள் கலந்து கொண்டு விளையாடுகின்றன. இதன் 3வது சீசன் கடந்த 9ம் தேதி தொடங்கியது. இந்நிலையில், இந்த தொடரில் நேற்று நடைபெற்ற ஒரு லீக் ஆட்டத்தில் பார்ல் ராயல்ஸ் - எம்.ஐ.கேப்டவுன் அணிகள் மோதின.

இந்த ஆட்டத்தில் முதலில் பேட்டிங் செய்த எம்.ஐ. கேப்டவுன் அணி 20 ஓவர்களில் 4 விக்கெட்டை இழந்து 158 ரன்கள் எடுத்தது. கேப்டவுன் தரப்பில் அதிகபட்சமாக வான் டெர் டுசென் 91 ரன்கள் எடுத்தார். பார்ல் ராயல்ஸ் தரப்பில் முஜீப் 2 விக்கெட் வீழ்த்தினார். தொடர்ந்து 159 ரன் எடுத்தால் வெற்றி என்ற இலக்குடன் ஆடிய பார்ல் ராயல்ஸ் அணி 19 ஓவர்களில் 4 விக்கெட்டை மட்டும் இழந்து 159 ரன் எடுத்து 6 விக்கெட் வித்தியாசத்தில் அபார வெற்றி பெற்றது.

பார்ல் ராயல்ஸ் தரப்பில் அதிகபட்சமாக லுவான்-ட்ரே பிரிட்டோரியஸ் 83 ரன்கள் எடுத்தார். எம்.ஐ. கேப்டவுன் தரப்பில் பவுல்ட், ரஷித் கான் ஆகியோர் தலா ஒரு விக்கெட் வீழ்த்தினார். இந்த தொடரில் இன்று நடைபெறும் ஒரு லீக் ஆட்டத்தில் ஜோபர்க் சூப்பர் கிங்ஸ் - பிரிட்டோரியா கேப்பிடல்ஸ் அணிகள் மோத உள்ளன. இந்த ஆட்டம் இந்திய நேரப்படி இரவு 9 மணிக்கு தொடங்குகிறது.