‘எனக்கு செட்டில்மென்ட் பண்ணியாச்சு’ என்ற தகவலுக்கு யாரும் காது கொடுக்க வேண்டாம்; இப்போதுதான் சீமான் நல்லா மாட்டி இருக்கிறார்: நடிகை விஜயலட்சுமி வீடியோ வெளியிட்டு விளக்கம்

சென்னை: ‘எனக்கு செட்டில்மென்ட் பண்ணியாச்சு என்ற தகவலுக்கு யாரும் காது கொடுக்க வேண்டாம்’ என நடிகை விஜயலட்சுமி வீடியோ வெளியிட்டு விளக்கம் அளித்துள்ளார்.

நடிகை விஜயலட்சுமி வெளியிட்டுள்ள வீடியோவில் கூறியிருப்பதாவது:
என்னுடைய வழக்கில் சீமான் உச்சநீதிமன்றம் சென்று விசாரணைக்கு இடைக்கால தடை வாங்கினார். அந்த தடையை வாங்கியபோது நீதிபதிகள் இழப்பீடு கொடுங்க என்று கூறினர். சீமானின் வழக்கறிஞர் சார்பில் ‘ஆமாம், நாங்கள் அதுபற்றிதான் பேசி கொண்டு வருகிறோம். நிச்சயமாக செய்வோம்’ என்று கூறி ஆர்டரை வாங்கினார். இப்போது தமிழ்நாடு மீடியாவுக்கு ஒரு குழப்பம் உள்ளது. அதாவது ‘அடுத்ததாக நான் என்ன செய்யப்போகிறேன் ? என்னிடம் பேச்சுவார்த்தை நடத்தினார்களா? எனக்கு இழப்பீடு கொடுத்தார்களா?’ என்ற குழப்பம் உள்ளது. நான் எல்லோரிடமும் பேச முடியாது. இதனால் இந்த வீடியோ மூலம் தெளிவுபடுத்துகிறேன்.

14 ஆண்டுகளாக இந்த வழக்கில் நான் எப்படி போராடி வருகிறேன் என்று உங்கள் அனைவருக்கும் தெரியும். இதில் எந்த அரசியலும் கிடையாது. சீமான்தான் தப்பிப்பதற்காக இதன் பின்னால் காங்கிரஸ் இருக்கு. பாஜக இருக்கு என்று பொய் சொல்லிவிட்டு தப்பித்து வருகிறார்.

அவள் ஒரு பாலியல் தொழிலாளி என்று மறைமுகமாக மிரட்டுகிறார். அப்படி சொல்லிவிட்டால் நான் பயந்துப்போய் இந்த வழக்கில் போராட மாட்டேன். இன்னும் சில காலம் பேசிவிட்டு இந்த வழக்கு முடிந்துவிடும் என்று சீமான் ஒரு தப்பு கணக்கு போடுகிறார். இப்போது சீமானிடம் நான் என்ன சொல்கிறேன் என்றால், பாலியல் தொழிலாளி என்று 14 ஆண்டுகளாக சொன்னதை நான் விடவே மாட்டேன். சுப்ரீம்கோர்ட்டுக்கு எடுத்துகொண்டு போய், ஏன் சீமானும், நாம் தமிழர் கட்சிக்காரர்களும் என்னை பாலியல் தொழிலாளி என்று கூறி சாகும் நிலைக்கு தள்ளுகிறார்கள் என்பதற்கு சீமான் பதில் சொல்லியே ஆகணும்.

இதனால் ‘வழக்கில் இருந்து பின்வாங்கிவிட்டதாகவோ, இல்லாவிட்டால் பெரிய தொகை செட்டில்மென்ட் பண்ணியாச்சு’ என்ற தகவலை யாரும் காது கொடுத்து கேட்க வேண்டாம். இப்போதுதான் சீமான் நல்லா மாட்டி இருக்கிறார். அடுத்ததாக என்னவெல்லாம் செய்யப்போகிறேன் என்பது என் தரப்பில் இருந்து தகவல் வரும். அதுவரை அனைவரும் பொறுமையாக இருங்க. சீமானிடம் நான் என்ன சொல்கிறேன் என்றால், என் வாழ்க்கையை சீரழித்துவிட்டு கடைசியாக சுப்ரீம் கோர்ட் சென்று தடை கொண்டு வந்து வித்தை காட்டியதும் அப்படியே விட்டுவிட்டு செல்ல நான் போராடவில்லை.

எனக்கு நியாயம் கிடைக்கும் வரை சுப்ரீம் கோர்ட் மட்டுமில்லை, எங்கே சென்றாலும் சீமான் பின்னால் சென்று போராட தயாராக இருக்கிறேன் என்பதை இந்த வீடியோவில் உறுதியாக கூறி கொள்கிறேன். இவ்வாறு வீடியோவில் கூறியுள்ளார்.

The post ‘எனக்கு செட்டில்மென்ட் பண்ணியாச்சு’ என்ற தகவலுக்கு யாரும் காது கொடுக்க வேண்டாம்; இப்போதுதான் சீமான் நல்லா மாட்டி இருக்கிறார்: நடிகை விஜயலட்சுமி வீடியோ வெளியிட்டு விளக்கம் appeared first on Dinakaran.