உங்கள் தொகுதியில் முதல்வர் திட்டத்தில் நிதிக்கு உட்பட்டு சாத்தியமுள்ள திட்டங்கள் நிறைவேற்றப்படும்: ஸ்டாலின் தகவல்

சென்னை: ‘உங்கள் தொகுதியில் முதலமைச்சர்’ திட்டத்தில் சட்டப்பேரவை உறுப்பினர்கள் கொடுக்கும் பணிகளை, நிதிக்கு உட்பட்டு, சாத்தியப்படக் கூடிய திட்டங்கள் நிறைவேற்றப்படும்’ என்று முதல்வர் மு.க.ஸ்டாலின் தெரிவித்தார்.

தமிழக சட்டப்பேரவையில், நெடுஞ்சாலைத் துறை மற்றும் பொதுப்பணித் துறை மானியக் கோரிக்கை மீதான விவாதம் நேற்று நடைபெற்றது. இந்த விவாதத்தை தொடங்கி வைத்து அதிமுக உறுப்பினர் திண்டுக்கல் சீனிவாசன் பேசும்போது, “உங்கள் தொகுதியில் முதலமைச்சர் திட்டத்தில் எத்தனை சட்டப்பேரவை உறுப்பினர்களின் கோரிக்கை நிறைவேற்றப்பட்டுள்ளது? சுங்கக்கட்டணத்தை மத்திய அரசு உயர்த்தியுள்ளது. நீங்கள் மத்திய அரசிடம் அழுத்தம் கொடுத்து குறைக்கச் சொல்ல வேண்டும்” என்றார். தொடர்ந்து நடைபெற்ற விவாதம் வருமாறு: