இலங்கையுடன் 2வது டெஸ்ட் வெற்றிகள் தொடர் கதை… ஆஸி.யின் புதிய பாதை: 9 விக்கெட் வித்தியாசத்தில் அசத்தல்

காலே: இலங்கைக்கு எதிரான 2வது டெஸ்டில் ஆஸ்திரேலியா அணி 9 விக்கெட் வித்தியாசத்தில் அபார வெற்றி பெற்று தொடரையும் கைப்பற்றி உள்ளது. இலங்கை சுற்றுப்பயணம் சென்றுள்ள ஆஸி கிரிக்கெட் அணி, 2 டெஸ்ட் போட்டிகள் கொண்ட தொடரில் ஆடி வந்தது. முதல் டெஸ்டில் ஒரு இன்னிங்ஸ் 242 ரன் வித்தியாசத்தில் பிரம்மாண்ட வெற்றி பெற்ற ஆஸி அணி, கடந்த 6ம் தேதி, 2வது டெஸ்ட் போட்டியை எதிர்கொண்டது.

முதலில் ஆடிய இலங்கை அணி 2வது நாள் துவக்கத்தில் அனைத்து விக்கெட்டுகளையும் இழந்து 257 ரன் எடுத்தது. இதையடுத்து களமிறங்கிய ஆஸி அணி வீரர்கள் அபாரமாக ஆடி ரன்களை குவித்தனர். 3ம் நாள் ஆட்டத்தின் உணவு இடைவேளைக்கு முன், ஆஸி அணி அனைத்து விக்கெட்டுகளையும் இழந்து 414 ரன் குவித்தது. அந்த அணியின் கேப்டன் ஸ்டீவன் ஸ்மித் 131, அலெக்ஸ் கேரி 156 ரன் குவித்தனர்.

இதையடுத்து, இலங்கை அணி 2வது இன்னிங்சை தொடர்ந்தது. ஆஸி வீரர்களின் சிறப்பான பந்து வீச்சை சமாளிக்க முடியாமல் இலங்கை வீரர்கள் அடுத்தடுத்து வீழ்ந்த வண்ணம் இருந்தனர். 3ம் நாள் ஆட்ட நேர முடிவில் இலங்கை அணி 62.1 ஓவர்களில் 8 விக்கெட் இழப்புக்கு 211 ரன் எடுத்திருந்தது. 54 ரன் முன்னிலையுடன் 4ம் நாளான நேற்று 2வது இன்னிங்சை இலங்கை தொடர்ந்தது. அடுத்த 6 ஓவர்களை மட்டுமே ஆடிய இலங்கை அணி 231 ரன்னுக்கு ஆல்அவுட் ஆனது.

இதைத் தொடர்ந்து, 75 ரன் வெற்றி இலக்குடன் ஆஸி துவக்க வீரர்கள் உஸ்மான் கவாஜா, டிராவிஸ் ஹெட் களமிறங்கினர். டிராவிஸ் 20 ரன்னில் ஜெயசூரியா பந்தில் மெண்டிசிடம் கேட்ச் தந்து அவுட்டானார். அதன் பின் ஜோடி சேர்ந்த மார்னஸ் லபுஷனேவும், கவாஜாவும் சிறப்பாக ஆடி வெற்றி இலக்கான 75 ரன்னை எட்டினர். இதனால் 9 விக்கெட் வித்தியாசத்தில் ஆஸி அபார வெற்றி பெற்றதோடு தொடரையும் கைப்பற்றியது. 156 ரன் குவித்த அலெக்ஸ் கேரி ஆட்ட நாயகனாகவும், தொடரில் 2 சதங்களை விளாசிய கேப்டன் ஸ்டீவன் ஸ்மித் தொடர் நாயகனாகவும் தேர்ந்தெடுக்கப்பட்டனர்.

The post இலங்கையுடன் 2வது டெஸ்ட் வெற்றிகள் தொடர் கதை… ஆஸி.யின் புதிய பாதை: 9 விக்கெட் வித்தியாசத்தில் அசத்தல் appeared first on Dinakaran.