இலங்கை சிறையிலிருந்து விடுவிக்கப்பட்ட ராமேஸ்வரம் மீனவர்கள் 6 பேர் சென்னை வந்தனர்

சென்னை: இலங்கை சிறையில் இருந்து விடுவிக்கப்பட்ட ராமேஸ்வரம் மீனவர்கள் 6 பேர் விமானம் மூலம் சென்னை வந்தனர். அவர்கள் அனைவரும் தமிழக அரசு ஏற்பாடு செய்த வாகனம் மூலம் சொந்த ஊருக்கு அனுப்பி வைக்கப்பட்டனர். ராமேஸ்வரம் மீனவர்கள் 6 பேர் கடந்த 12ம் தேதி விசைப்படகில் கடலுக்கு மீன் பிடிக்க சென்றபோது இலங்கை கடற்படையினரால் சுற்றிவளைக்கப்பட்டு இலங்கை நீதிமன்றத்தில் ஆஜர்படுத்தி சிறை வைக்கப்பட்டனர். இவர்களின் விசைப்படகும் பறிமுதல் செய்யப்பட்டது. இதனையடுத்து தமிழ்நாடு முதல்வர் மு.க.ஸ்டாலின், பிரதமர் மற்றும் வெளியுறவு துறை அமைச்சருக்கு அவசர கடிதங்கள் எழுதினார்.

இந்நிலையில், இலங்கையில் உள்ள இந்திய தூதரக அதிகாரிகள், இலங்கை அரசிடம் பேசி கடந்த 28ம் தேதி ராமேஸ்வரம் மீனவர்கள் 6 பேரையும் விடுவித்தனர். இதையடுத்து இவர்கள் 6 பேரும் விமான மூலம் இந்தியாவுக்கு அனுப்பி வைக்கப்பட்டனர். இவர்கள் இலங்கையில் இருந்து சென்னை வரும் ஏர் இந்தியா பயணிகள் விமானத்தில் சென்னை வந்தனர். இவர்களை சென்னை விமான நிலையத்தில், தமிழ்நாடு மீன்வளத்துறை அதிகாரிகள் நேரில் சென்று வரவேற்று அரசு ஏற்பாடு செய்திருந்த வாகனத்தில் அனைவரையும் ராமேஸ்வரத்திற்கு அனுப்பி வைத்தனர்.

The post இலங்கை சிறையிலிருந்து விடுவிக்கப்பட்ட ராமேஸ்வரம் மீனவர்கள் 6 பேர் சென்னை வந்தனர் appeared first on Dinakaran.