அரசின் திட்டங்கள், 32 லட்சம் வேலைவாய்ப்பால் பொருளாதார வளர்ச்சி 9.69 சதவீதத்தை எட்டியது: தமிழக தொழில்துறை பெருமிதம்

சென்னை: தமிழக அரசின் பல்வேறு திட்டங்கள், ரூ.10.14 லட்சம் கோடிக்கான முதலீடுகள் மற்றும் 32 லட்சம் வேலைவாய்ப்புகளால், தமிழகம் 9.69 சதவீதம் பொருளாதார வளர்ச்சியை எட்டியுள்ளதாக தொழில்துறை பெருமிதம் தெரிவித்துள்ளது.

இதுகுறித்து, தமிழக தொழில்துறை வெளியிட்டுள்ள செய்திக்குறி்ப்பில் கூறியிருப்பதாவது: தமிழகம் 2024-25-ம் ஆண்டில் 9.69 சதவீதம் உண்மை வளர்ச்சி வீதத்துடன் இந்தியாவிலேயே மிக அதிக வளர்ச்சியைப் பதிவு செய்துள்ளது. மேலும், கடந்த 10 ஆண்டுகளில் தமிழகம் அடைந்த மிக உயர்ந்த வளர்ச்சி வீதம் இதுவாகும்.