அடிப்படை வசதியற்ற தாம்பரம் ஆயுதப்படை அலுவலகம் - மன உளைச்சலில் காவலர்கள்!

தாம்பரம் மாநகர காவல் ஆணையரக அலுவலகம், சோழிங்க நல்லூரில் வாடகை கட்டிடத்தில் இயங்கி வருகிறது. தாம்பரம் மாநகராட்சிக்கு சொந்தமாக பதுவஞ்சேரியில் உள்ள திருமண மண்டபத்தில் ஆயுதப்படை அலுவலகம் செயல்பட்டு வருகிறது. இங்கு 1,800 காவலர்கள் உள்ளனர். இதில், 800 பேர் தாம்பரம் ஆணையரகத்தின் கீழ் உள்ள 23 காவல் நிலையங்களில் பணி செய்கின்றனர். மேலும் 400 பேர் பதுவஞ்சேரியில் உள்ள ஆயுதப்படையில் பணி செய்கின்றனர்.

இவர்கள் முக்கிய பாதுகாப்புக்கு அவ்வப்போது அனுப்பி வைக்கப்படுவார்கள். தற்போது உள்ள அலுவலகத்தில் கீழ் தளம், முதல் தளம் என 2 தளங்கள் உள்ளன. இந்த இரண்டு தளங்களையும் உயர் அலுவலர்கள் பயன்படுத்தி வருகின்றனர். ஆனால், காவலர்களுக்கு போதிய அடிப்படை வசதிகள் செய்து தரப்படவில்லை.