வாடகை வீட்டில் வசித்த இளம்பெண்ணுக்கு பாலியல் தொல்லை கொடுத்த அதிமுக நிர்வாகி கைது: துடைப்பங்கட்டையால் தாக்குவது சமூகவலைதளங்களில் வைரல்

சென்னை: காஞ்சிபுரம் மாவட்டம், மணிமங்கலம் அருகே படப்பை பகுதியை சேர்ந்தவர் பொன்னம்பலம் (60). இவர், குன்றத்தூர் ஒன்றிய அதிமுகவில் எம்ஜிஆர் அணி இணை செயலாளராக பதவி வகித்து வருகிறார். சுங்குவார்சத்திரம் பகுதியில் உள்ள பாக்ஸ்கான் நிறுவனத்தில் வேலை செய்யும் 24 வயதுடைய 2 இளம்பெண்கள் இவரது வீட்டில் குடியிருந்து வந்துள்ளனர். அதிமுக நிர்வாகியான பொன்னம்பலம், கடந்த 20 நாட்களுக்கு முன்பு ஒரு இளம்பெண்ணிடம் தகாத முறையில் பேசி பாலியல் தொல்லை கொடுத்ததாக கூறப்படுகிறது.

இதனால் அதிர்ச்சியடைந்த 2 பெண்களும், அவரது வாடகை வீட்டிலிருந்து வெளியேறி கீழ்படப்பை பகுதியில் மற்றொரு வீட்டிற்கு குடியேறி உள்ளனர். இந்நிலையில், இளம்பெண்ணை செல்போனில் தொடர்புகொண்ட பொன்னம்பலம், குறிப்பிட்ட இடத்திற்கு வரவழைத்து அண்மையில் பாலியல் தொல்லை கொடுத்துள்ளார். இதனால் 2 பெண்களும், அவரது சக தோழியுடன் சேர்ந்து பொன்னம்பலத்தை துடைப்பங் கட்டையால் சரமாரியாக அடித்துள்ளனர். பிறகு மணிமங்கலம் போலீசாருக்கு தகவல் தெரிவித்துள்ளனர்.

அதன்பேரில், சம்பவ இடத்திற்கு விரைந்து சென்ற போலீசார், அதிமுக நிர்வாகி பொன்னம்பலத்தை கைது செய்து, அவர் மீது பெண் வன்கொடுமை சட்டம், பெண்களிடம் ஆபாசமாக பேசுதல், பெண்களை தாக்கியது உள்பட 3 பிரிவின் கீழ் வழக்குபதிவு செய்து தொடர்ந்து விசாரணை நடத்தி வருகின்றனர். இதனிடையே, இளம்பெண்ணுக்கு பாலியல் தொல்லை கொடுக்க முற்பட்ட அதிமுக நிர்வாகி பொன்னம்பலத்தை தனது தோழிகளுடன் சேர்ந்து துடைப்பங் கட்டையால் தாக்கும் வீடியோ தற்போது சமூக வலைதளங்களில் வைரலாகி வருகிறது.இந்நிலையில், அதிமுக நிர்வாகி பொன்னம்பலத்தை கைது செய்த போலீசார் நீதிமன்றத்தில் ஆஜர்படுத்தி சிறையில் அடைத்தனர்.

* அதிமுக நிர்வாகி கட்சியிலிருந்து நீக்கம்
அதிமுக பொதுச்செயலாளர் எடப்பாடி பழனிசாமி நேற்று வெளியிட்டுள்ள அறிவிப்பு: அதிமுகவுக்கு அவப்பெயர் உண்டாகும் விதத்தில் செயல்பட்ட காரணத்தினால், காஞ்சிபுரம் மாவட்டத்தை சேர்ந்த எம்.பொன்னம்பலம் (குன்றத்தூர் மேற்கு ஒன்றிய எம்ஜிஆர் மன்ற இணைச்செயலாளர்) இன்று முதல் கட்சியின் அடிப்படை உறுப்பினர் பொறுப்பு உள்பட அனைத்து பொறுப்புகளில் இருந்தும் நீக்கி வைக்கப்படுகிறார்.

The post வாடகை வீட்டில் வசித்த இளம்பெண்ணுக்கு பாலியல் தொல்லை கொடுத்த அதிமுக நிர்வாகி கைது: துடைப்பங்கட்டையால் தாக்குவது சமூகவலைதளங்களில் வைரல் appeared first on Dinakaran.