வரலாற்றில் அழிக்க முடியாத ஆட்சியாக திராவிட மாடல் ஆட்சி இருக்கும்: மு.க.ஸ்டாலின்

அரியலூர்,

அரியலூரில் நடைபெற்ற அரசு விழாவில் முதல்-அமைச்சா் மு.க.ஸ்டாலின் பேசியதாவது:-

உங்கள் குழந்தைகள் நாளைக்கு வளர்ந்து நல்ல நிலையை அடையும்போது, சொல்ல வேண்டும். ஸ்டாலின் முதல் முறை முதல்-அமைச்சராக இருந்தபோது கொண்டுவந்த "காலை உணவுத் திட்டத்தில்" தினமும் சுவையான உணவு உண்ட, 18 லட்சம் குழந்தைகளில் நானும் ஒருவன் என்று சொல்ல வேண்டும்.

ஸ்டாலின் கொண்டுவந்த, ஊட்டச்சத்தை உறுதிசெய் திட்டத்தால் எனக்கு சத்தான உணவு கிடைத்தது என்று சொல்ல வேண்டும். நான் முதல்வன், தமிழ்ப் புதல்வன், புதுமைப் பெண் திட்டங்கள் மூலமாக, நானும் என் குடும்பமும் முன்னேற, ஸ்டாலின் ஒரு முக்கிய காரணம் என்று சொல்ல வேண்டும். நிச்சயம் சொல்வார்கள். அவர்களின் வாழ்த்துகளிலும், அன்பிலும்தான் இந்த ஸ்டாலின் தமிழர்களின் மனதில் என்றும் நிறைந்திருப்பான்.

எதிர்காலத்திலும் தொடரப்போகும் இந்த திட்டங்களால், வரலாற்றில் திராவிட மாடல் அரசும், அதை வழிநடத்தும் இந்த ஸ்டாலின் பெயரும் அழிக்க முடியாதபடி என்றென்றும் நிலைத்திருக்கும் என்பதை மாத்திரம் இந்த நேரத்தில் உறுதியோடு எடுத்து சொல்லிக்கொள்கிறேன்.

என்றைக்கும் உங்களோடு இருக்கக்கூடியவர்கள் தான் நாங்கள். எங்களோடு நீங்கள் நிச்சயமாக, உடனிருப்பவர்களாக இன்றைக்கு இருந்து கொண்டிருக்கிறீர்கள். எனவே அப்படிப்பட்ட ஆதரவை நீங்கள் தொடர்ந்து வழங்க வேண்டும். இந்த அரசுக்கு என்றைக்கும் நீங்கள் துணை நிற்க வேண்டும் என்று அன்போடு கேட்டுக்கொள்கிறேன். இவ்வாறு அவர் கூறினார்.