“வடக்கு, தெற்கு என பிரிவினைவாதம் பேசாமல் வளர்ச்சிக்கு முதல்வர் துணை நிற்க வேண்டும்” - வானதி சீனிவாசன்

கோவை: “வடக்கு, தெற்கு என பிரிவினைவாதம் பேசி மக்களை திசை திருப்பாமல், ஆக்கபூர்வமான நடவடிக்கைகளுக்கு முதல்வர் ஸ்டாலின் துணை நிற்க வேண்டும்” என பாஜக தேசிய மகளிரணி தலைவரும், கோவை தெற்கு தொகுதி எம்எல்ஏவுமான வானதி சீனிவாசன் தெரிவித்தார்.

கோவையில் இன்று (புதன்கிழமை) தமிழக முதல்வர் பங்கேற்ற நிகழ்ச்சியில் கலந்து கொண்ட வானதி சீனிவாசன் பின்பு செய்தியாளர்களிடம் பேசினார். அப்போது அவர் கூறியதாவது: தமிழக அரசு சார்பில் பிரம்மாண்டமான முறையில் நூலகம் கோவை தெற்கு தொகுதியில் அமைக்கப்படுகிறது. நூலகம் பல தலைமுறைகளுக்கான திட்டமாகும். அதற்காக முதல்வருக்கு நன்றி தெரிவித்து கொள்கிறோம். கோவையில் நடைபெற்ற விழாவின் நிறைவில் அவரை நேரில் சந்தித்து கோவை தெற்கு தொகுதி சார்ந்த கோரிக்கை மனுவினை அளித்தேன்.