மாற்றுத்திறனாளிகளுக்கு நாளை உதவி உபகரணங்கள் வழங்கும் மதிப்பீட்டு முகாம்

விருதுநகர்: மாற்றுத்திறனாளிகளுக்கு நாளை உதவி உபகரணங்கள் வழங்கும் மதிப்பீட்டு முகாம் நடைபெற உள்ளது. விருதுநகர் மாவட்டத்தில் உள்ள மாற்றுத்திறனாளிகளுக்கு உதவி உபகரணங்கள் வழங்கும் மதிப்பீட்டு முகாம் இந்திய செயற்கை மூட்டுகள் உற்பத்திக் கழகம் மூலம் நாளை காலை 10.30 மணி முதல் புதிய கலெக்டர் அலுவலக மனுக்கள் பெறும் இடத்தில் நடைபெற உள்ளது.

முகாமில் பார்வையற்ற மாற்றுத்திறனாளிக்கு மடக்கு ஊன்றுகோல், காது மற்றும் வாய் பேசாதோருக்கு காதொலி கருவி, மூளை முடக்குவாதத்தால் பாதிக்கப்பட்டோருக்கு சிறப்பு சக்கர நாற்காலி, மனவளர்ச்சி குன்றியோருக்கு கற்பித்தல், கற்றல் பொருட்கள், கை, கால் பாதிக்கப்பட்டோருக்கு மூன்று சக்கர சைக்கிள், ஊன்றுகோல், சக்கர நாற்காலி மற்றும் மின்கலம் பொருத்தப்பட்ட மூன்று சக்கர சைக்கிள் உள்ளிட்ட உபகரணங்கள் பெறுவதற்கு மதிப்பீடு முகாம் நடத்தப்பட உள்ளது.

முகாமில் மாற்றுத்திறனாளி அடையாள அட்டை நகல், ஆதார் அட்டை நகல், ரேசன்கார்டு நகல், புகைப்படம் 4 ஆகிய ஆவணங்களுடன் கலந்து கொள்ள வேண்டும். கூடுதல் விவரங்களுக்கு மாவட்ட மாற்றுத்திறனாளிகள் நல அலுவலக தொலைபேசி எண் 04562-252068ல் தொடர்பு கொள்ளலாம்.

The post மாற்றுத்திறனாளிகளுக்கு நாளை உதவி உபகரணங்கள் வழங்கும் மதிப்பீட்டு முகாம் appeared first on Dinakaran.