மழைக்காலம்… மின்சார வாகனம் வைத்திருப்போரே உஷார்.! சார்ஜ் செய்யும் போது அதிக கவனம் தேவை..

சென்னை: மழைக் காலத்தில் தனிப்பட்ட முறையில் நாம் பல்வேறு சிரமங்களை எதிர்கொள்கிறோம். இந்நிலையில் மழையின் போது நாம் பயன்படுத்தும் வாகனங்களில் சில முன்னெச்சரிக்கை நடவடிக்கைகளை மேற்கொள்ள வேண்டியது அவசியமாகும். தற்போது மின்சார வாகனங்கள் பயன்படுத்துவோர் எண்ணிக்கை அதிகரித்துள்ளது. அதன்படி மழைக்காலங்களில் இந்த வாகனங்களை பயன்படுத்துவது பாதுகாப்பாக இருக்குமா என்ற கேள்வியும் எழுகிறது. ஏனெனில் மழைநீர் அதிகம் தேங்கக் கூடிய சாலையில் செல்லும் பட்சத்தில் மின்சார வாகனத்தில் பழுது ஏற்பட்டால் அதனை சரி செய்வது கடினமாக ஒன்றாக இருக்கிறது. இருப்பினும் வாகன மோகம் குறையாததால் மின்சார வாகனத்தை இன்னமும் அதிகம்பேர் பயன்படுத்துகின்றனர்.

மழைக்காலத்தின் போது இருசக்கர மின்வாகனங்கள் மீது தனி கவனம் செலுத்த வேண்டும். மின்சார இருசக்கர வாகனத்தை நிறுத்தும் இடம் மிக முக்கியமானது. வாகனம் நிறுத்தும் இடம் பாதுகாப்பாக இருக்க வேண்டும். மூடப்பட்ட பகுதியின் கீழ் வாகனத்தை நிறுத்த வேண்டும். முடியாவிட்டால், வாகனத்தின் மீது ஒரு கவர் போட்டு பாதுகாக்க வேண்டும். மழையில் நீண்டநேரம் எலக்ட்ரிக் வாகனம் நனைந்தால், குறிப்பிட்ட காலத்திற்குப் பிறகு வண்டி பழுதடையும் என தனியார் மின்சார வாகன ஷோரூம் உரிமையாளர்கள் தெரிவிக்கின்றனர்.

இதுதொடர்பாக அவர்கள் கூறியதாவது: மின்சார வாகனத்தில் பேட்டரி மிக முக்கியமான பகுதியாகும். ஸ்கூட்டரை இயங்க வைக்க அது நிலையான ரசாயன எதிர்வினைகளை ஆற்றுகிறது. எனவே பேட்டரியின் உறையானது நீர் கசிவைத் தாங்கும் அளவுக்கு நன்றாக மூட வேண்டும். பெரும்பாலான மின்சார ஸ்கூட்டர் பேட்டரிகள் 30 நிமிடங்கள் வரை, ஒரு மீட்டர் தண்ணீரில் மூழ்கியிருந்தாலும் தொடர்ந்து இயங்கும். பேட்டரிகள் மட்டுமல்ல, முழு மின்சார ஸ்கூட்டர்கள், சார்ஜர்கள் மற்றும் சார்ஜிங் கேபிள்களில் கூட பாதுகாப்பு உள்ளது.

மேலும், மின்சார ஸ்கூட்டர்களில் டெயில்பைப்புகள், எக்ஸாஸ்ட் பைப்புகள் இல்லை. இது மழைநீர் அமைப்புக்குள் நுழையும் அல்லது வெள்ளம் ஏற்படும் அபாயத்தைக் குறைக்கிறது. மேலும் மின்சார இருசக்கர வாகனம் மற்றும் உட்புற பாகங்கள் உணர்திறன் மின்னணு மற்றும் சென்சார்கள் நிறைந்தவை. அவை நனைந்தால் சேதமடைய வாய்ப்புள்ளது. அவை மிகவும் விலை உயர்ந்தவை. மின்சார இருசக்கர வாகனங்கள் பேட்டரியை தவறாமல் சரிபார்க்கவும். இன்சுலேஷன் அல்லது கனெக்டர் பிரச்னைகளை உடனடியாக சரிசெய்யவும். முடியாவிட்டால், வாகனத்தை ஸ்டார்ட் செய்யாமல் அங்கீகரிக்கப்பட்ட சேவை நிலையத்திற்கு எடுத்துச் செல்லவும். இவ்வாறு அவர்கள் கூறினர்.

மழையின்போது மின்சார வாகனத்தை இயக்குவது எப்படி?
* மழையின்போது, ​​வேகத்தின் தேவையை குறைக்கவும்.
* பிரேக்குகள் சரியாக இருப்பதை கவனிக்க வேண்டும்.
* உங்கள் இருசக்கர வாகனத்திற்கும் மற்ற வாகனங்களுக்கும் இடையே இடைவெளியை கடைப்பிடிக்கவும்.
* சாலை ஈரமாக இருக்கும்போது யூ-டார்ன் எடுக்கும்போது வேகத்தைக் குறைக்கவும்.
* ஹெட்லைட் மற்றும் பின்புற விளக்குகள் பிரகாசமாக இருப்பதை உறுதி செய்யவும். பிரேக் விளக்குகளையும் சோதிக்கவும்.
* மழைக்காலத்திற்கு முன்னும், பின்னும் வாகனங்களை சர்வீஸ் செய்யவது நல்லது. இது உங்கள் மின்சார ஸ்கூட்டர் முழுமையாகச் சரிபார்க்கப்படுவதை உறுதி செய்யும்.

மின்சார வாகனங்களை சார்ஜ் செய்வது எப்படி?
* சார்ஜிங் முள் மற்றும் சாக்கெட் இரண்டும் வறண்டு இருப்பதை உறுதி செய்து கொள்ளவும்.
* சார்ஜ் செய்த பிறகு சார்ஜிங் பிளாப்பை மூடுவதை எப்போதும் உறுதி செய்யவும். இது சார்ஜிங் போர்ட்டில் தண்ணீர் நுழைவதைத் தடுக்கிறது.
* மின்சார வாகனங்கள் தண்ணீர் தேங்கியுள்ள சாலைகளில் ஓரளவிற்கு செல்ல முடியும் என்றாலும், ஆழமான நீரைத் தவிர்க்க அறிவுறுத்தப்படுகிறது.
* ஸ்கூட்டருக்கான நீர்-எதிர்ப்பு கவரில் முதலீடு செய்ய வேண்டும். இது மழை மற்றும் ஈரப்பதத்திலிருந்து பாதுகாக்கும், உலர்வாகவும் இருக்கும்.
* மழை மற்றும் ஈரப்பதத்திலிருந்து பாதுகாக்க ஸ்கூட்டரை சார்ஜ் செய்ய ஒரு மூடப்பட்ட பகுதியில் நிறுத்த வேண்டும்.

மழைநீர் தேங்கிய பள்ளத்தில் சிக்கிக்கொண்டால் என்ன செய்வது?
* மழை பெய்யும்போது எந்த கவலையும் இல்லாமல் மின்சார ஸ்கூட்டரை ஓட்டலாம். இருப்பினும், ஸ்கூட்டர் ஆழமான நீரில் சிக்கிக்கொண்டால் சில சிக்கல்கள் ஏற்படலாம். எலக்ட்ரிக் ஸ்கூட்டரின் மின் கூறுகள் ஈரமாக இருந்தால், சார்ஜரை செருக வேண்டாம். அதை முழுமையாக உலர விடவும். மின் இருசக்கர வாகனத்தின் உடலில் உள்ள இடைவெளிகளில் சிறிது சூடான காற்றுக்கு பதில் ஹேர் ட்ரையரைப் பயன்படுத்தலாம்.
* மின்சார வாகனத்தில் வெளியே செல்வதை தவிர்ப்பது நல்லது.

The post மழைக்காலம்… மின்சார வாகனம் வைத்திருப்போரே உஷார்.! சார்ஜ் செய்யும் போது அதிக கவனம் தேவை.. appeared first on Dinakaran.