மணிப்பூரில் எம்.எல்.ஏ.க்களின் சொத்துக்களை சேதப்படுத்தியதாக 7 பேர் கைது

இம்பால்,

வடகிழக்கு மாநிலமான மணிப்பூரில் பழங்குடியின அந்தஸ்து வழங்கும் விவகாரத்தில் மெய்தி மற்றும் குகி இன மக்களுக்கு இடையே நிலவி வந்த மோதல் கடந்த ஆண்டு மே மாதம் பெரும் கலவரமாக வெடித்தது. 1½ ஆண்டுகளுக்கு மேல் ஆகியும் அங்கு இன்னும் வன்முறை ஓய்ந்தபாடில்லை. குகி மற்றும் மெய்தி இனத்தை சேர்ந்த பயங்கரவாத குழுக்கள் தொடர்ந்து பரஸ்பரம் தாக்குதல்களில் ஈடுபட்டு வருகின்றனர்.

அதன் தொடர்ச்சியாக கடந்த 11-ந் தேதி 2 ஆண்கள் உயிருடன் எரித்துக்கொல்லப்பட்டனர். மேலும் 3 பெண்கள் மற்றும் 3 குழந்தைகளை பயங்கரவாதிகள் கடத்தி சென்றனர். அவர்களை பத்திரமாக மீட்க வலியுறுத்தி போராட்டங்கள் நடைபெற்று வந்த நிலையில் கடந்த 15-ம் தேதி 6 பேரும் பிணமாக மீட்கப்பட்டனர். இது மாநிலம் முழுவதும் கடும் அதிர்வலைகளை ஏற்படுத்தியது.

இதையடுத்து மாநில அரசுக்கு எதிராக மக்கள் போராட்டத்தில் குதித்தனர். இம்பால் உள்பட பல மாவட்டங்களில் உள்ள 3 மந்திரிகள் மற்றும் 6 எம்.எல்.ஏ.க்களின் வீடுகளை நோக்கி பேரணியாக சென்ற மக்கள் அவர்களது வீடுகளை சூறையாடினர். இதனையடுத்து மாநிலம் முழுவதும் தொடர்ந்து பதற்றம் நீடித்த நிலையில் பாதுகாப்பு நடவடிக்கைகள் பலப்படுத்தப்பட்டன.

இந்த நிலையில், எம்.எல்.ஏ.க்களின் சொத்துக்களை சேதப்படுத்தியது தொடர்பான வழக்குகள் தொடர்பாக 7 பேரை மணிப்பூர் போலீசார் கைது செய்துள்ளனர். அவர்களிடம் போலீசார் விசாரணை நடத்தி வருகின்றனர். முன்னதாக எம்.எல்.ஏ.க்கள் மற்றும் மந்திரிகளின் வீடுகளுக்கு தீ வைத்ததாக 25 பேர் கைது செய்யப்பட்டிருப்பது குறிப்பிடத்தக்கது.