பீகாரில் நடைபெற்ற புஷ்பா 2 படத்தின் டிரைலர் வெளியீட்டு நிகழ்ச்சி: நடிகர் அல்லு அர்ஜுனை காண கட்டுக்கடங்காத கூட்டம் கூடியதால் ரசிகர்களிடையே தள்ளுமுள்ளு

பாட்னா: பீகாரில் நடைபெற்ற புஷ்பா 2 படத்தின் டிரைலர் வெளியீட்டு நிகழ்ச்சியில் நடிகர் அல்லு அர்ஜுனை காண கட்டுக்கடங்காத கூட்டம் கூடியதால் தள்ளுமுள்ளு ஏற்பட்டது. நடிகர் அல்லு அர்ஜுன் நடிப்பில் உருவாகி உள்ள புஷ்பா 2 திரைப்படம் ஹிந்தி, தமிழ் உள்ளிட்ட பல்வேறு மொழிகளில் டிசம்பர் 5ஆம் தேதி வெளியாக உள்ளது. இந்த படத்தின் டிரைலர் வெளியீட்டு விழா பீகார் மாநிலம் பாட்னாவில் பிரமாண்டமாக நடைபெற்றது. பாட்னாவில் உள்ள காந்தி மைதானத்தில் மாலை 5 மணிக்கு தொடங்கிய நிகழ்ச்சியில் நடிகர் அல்லு அர்ஜுன், நடிகை ராஷ்மிகா மந்தனா உள்ளிட்ட பலர் கலந்து கொண்டனர்.

இதில் புஷ்பா 2 படத்தின் டிரைலர் வெளியிடப்பட்டது. இதனிடையே நடிகர் அல்லு அர்ஜுனை பார்க்க ரசிகர்கள் கூட்டம் கூட்டமாக பாட்னாவில் உள்ள காந்தி மைதானத்தில் குவிந்தனர். நிகழ்ச்சியை பார்க்க ரசிகர்கள் முந்தியடித்து சென்றதால் தள்ளுமுள்ளு ஏற்பட்டது. டிரைலரைகாண ஆர்வ மிகுதியில் அங்கிருந்த ஸ்பீக்கர் மற்றும் மின்விளக்கு டவரில் ரசிகர்கள் சிலர் ஏறியதால் பரபரப்பு ஏற்பட்டது. 2021ஆம் ஆண்டு வெளியான புஷ்பா திரைப்படம் மாநில எல்லைகளை கடந்து இந்திய அளவில் அதிக ரசிகர்களிடையே பெரும் வரவேற்பை பெற்றது. இதனால் அல்லு அர்ஜுனுக்கு பல்வேறு மாநிலங்களில் ரசிகர்கள் பட்டாளம் உருவாகி உள்ளது குறிப்பிடத்தக்கது.

The post பீகாரில் நடைபெற்ற புஷ்பா 2 படத்தின் டிரைலர் வெளியீட்டு நிகழ்ச்சி: நடிகர் அல்லு அர்ஜுனை காண கட்டுக்கடங்காத கூட்டம் கூடியதால் ரசிகர்களிடையே தள்ளுமுள்ளு appeared first on Dinakaran.