பல்லடம் அருகே சட்டவிரோதமாக குடியேறி கடன்வாங்கி 7 வீடுகள் கட்டி வாடகைக்குவிட்ட வங்கதேசத்தவர் அதிரடி கைது

* மனைவி விஷம் குடித்து தற்கொலை முயற்சி, நிதி நிறுவனம் சீல் வைத்த சம்பவத்தில் திடீர் திருப்பம்

பல்லடம்: பல்லடம் அருகே கரைப்புதூரில் 15 ஆண்டுக்கு முன்பே சட்ட விரோதமாக குடியேறி 7 வீடுகளை கட்டி வாடகைக்கு விட்ட வங்கதேசத்தை சேர்ந்தவர் கைது செய்யப்பட்டார். இதனால் அவரது மனைவி விஷம் குடித்து தற்கொலைக்கு முயன்றார். 7 வீடுகளுக்கு நிதி நிறுவனம் சீல் விவகாரத்தில் போலீசார் நடத்திய விசாரணையில் திடுக்கிடும் தகவல்கள் வெளியாகி உள்ளது. திருப்பூர் மாவட்டம், பல்லடம் அருகே கரைப்புதூர் ஊராட்சி எம்.ஏ. நகரில் வசித்தவர்கள் சைமன் (45), கீதா தம்பதியர்.

இவர்கள் அப்பகுதியில் வீடு கட்ட கோவையில் உள்ள தனியார் நிதி நிறுவனத்தில் ரூ.43 லட்சம் கடன் பெற்றனர். மாதம் ரூ.63 ஆயிரம் தவணை தொகையை கடந்த 2 ஆண்டுகளாக செலுத்தினர். கடந்த 4 மாதங்களுக்கு முன்பு சைமனுக்கு உடல் நலம் பாதிக்கப்பட்டதால் கடந்த 4 மாதங்களாக வீட்டு கடன் தவணை செலுத்தவில்லை. இந்நிலையில், நீதிமன்ற உத்தரவின்படி நேற்று முன்தினம் தனியார் நிதி நிறுவனத்தினர் எம்.ஏ. நகருக்கு வழக்கறிஞர்களுடன் வந்து சைமனின் வீட்டின் முன்பு ஜப்தி அறிவிப்பு பதாகையை வைத்து, 7 வீடுகளுக்கான மின் இணைப்பை துண்டித்தனர்.

மேலும் சைமன், கீதா தம்பதியின் வீடு மற்றும் அவர்களால் வாடகைக்கு விடப்பட்டு இருந்த 6 வீடு என 7 வீடுகளுக்கும் சீல் வைத்தனர். இதனால் மனவேதனை அடைந்த கீதா, வீட்டில் இருந்த எலி மருந்தை குடித்து விட்டார். இதனால் மயங்கி சாய்ந்த அவரை உறவினர்கள் பல்லடம் அரசு மருத்துவமனையில் சிகிச்சைக்காக அனுமதித்துள்ளனர். வீடுகளுக்கு சீல் வைக்கப்பட்டதால், தங்குவதற்கு வீடு இல்லாமல் 7 குடும்பத்தினரும் தற்போது நடுத்தெருவில் தவித்தனர்.

இதுகுறித்து பல்லடம் போலீசார் விசாரணை நடத்தி வருகிறார்கள். இந்நிலையில் சைமனிடம் போலீசார் நடத்திய விசாரணையில், அவர் கடந்த 15 ஆண்டுகளுக்கு முன்பே வங்கதேசத்திலிருந்து இந்தியாவிற்கு சட்ட விரோதமாக வந்து நிதி நிறுவனத்தில் கடன் வாங்கி வீடு கட்டி வாடகைக்கு விட்டது தெரியவந்தது. இதையடுத்து சைமனை பல்லடம் போலீசார் கைது செய்து சென்னை புழல் சிறையில் அடைத்தனர்.

The post பல்லடம் அருகே சட்டவிரோதமாக குடியேறி கடன்வாங்கி 7 வீடுகள் கட்டி வாடகைக்குவிட்ட வங்கதேசத்தவர் அதிரடி கைது appeared first on Dinakaran.