தொடர் விடுமுறை நிறைவடைந்தது: சொந்த ஊர் சென்றவர்கள் சென்னை திரும்பினர்; கடும் போக்குவரத்து நெரிசல்

பொங்கல் பண்டிகைக்கான தொடர் விடுமுறை முடிந்த நிலையில், சொந்த ஊர் சென்றவர்கள் முற்றிலுமாக சென்னை திரும்பினர். இதனால் சுங்கச்சாவடிகளில் கடும் போக்குவரத்து நெரிசல் ஏற்பட்டது.

நடப்பாண்டு பொங்கல் பண்டிகையின்போது சுமார் 9 நாட்கள் தொடர் விடுமுறை கிடைத்தது. இதனால் கடந்த 10-ம் தேதி முதல் சென்னையில் இருந்து ஏராளமானோர் சொந்த ஊர்களுக்கு பயணிக்கத் தொடங்கினர். இதற்காக அரசு போக்குவரத்துக் கழகங்கள் சார்பில் சிறப்பு பேருந்துகள், ரயில்கள் இயக்கப்பட்டன. அந்த வகையில் அரசு பேருந்துகளில் மட்டும் ஜன.10 முதல் 14-ம் தேதி அதிகாலை வரை 8.72 லட்சம் பயணிகள் சொந்த ஊர்களுக்கு பயணமாகியிருந்தனர்.