தேசிய சாலை பாதுகாப்பு வாரவிழா கடைபிடிப்பு; ஓடும் பேருந்தில் ஏறவோ, இறங்கவோ கூடாது: வாகன விழிப்புணர்வு பேரணியில் அறிவுறுத்தல்

திருச்சி, ஜன.31: தேசிய சாலை பாதுகாப்பு வார விழாவையொட்டி தமிழ்நாடு அரசு போக்குவரத்து கழக கும்பகோணம் கோட்டம், திருச்சி மண்டலம் சார்பில் பல்வேறு விழிப்புணர்வு நிகழ்ச்சிகள் நடந்தது. திருச்சி மாவட்டத்தில் தமிழ்நாடு அரசு போக்குவரத்து கழக கும்பகோணம் கோட்டம், திருச்சி மண்டலம் சார்பில் இந்த மாதம் தேசிய சாலை பாதுகாப்பு மாதமாக கடைப்பிடிக்கப்பட்டு வருகிறது. இதற்காக பல்வேறு விழிப்புணர்வு நிகழ்ச்சிகள் நடத்தப்பட்டு வருகின்றன. அதன் வகையில் விழிப்புணர்வு பட்டிமன்றம் மற்றும் சாலை பாதுகாப்பு விழிப்புணர்வு வாகனம், சாலை பாதுகாப்பு விழிப்புணர்வு பதாகை, சாலை பாதுகாப்பு விழிப்புணர்வு பற்றி பொது மக்களுக்கும், பயணிகளுக்கும் பேருந்து நிலையத்தில் துண்டு பிரசுரம் வழங்குதல், தலைக்கவசம் அணிவதன் முக்கியத்துவம் மற்றும் இருசக்கர வாகன விழிப்புணர்வு பேரணி ஆகியவை நேற்று நடந்தது.

திருச்சி மத்திய பேருந்து நிலையத்தில் துவங்கிய இந்த சாலை பாதுகாப்பு வார விழா விழிப்புணர்வு பேரணியில், வாகன ஓட்டிகள் சாலையின் இடதுபுரத்திலேயே வாகனங்களை ஓட்டிச்செல்ல வேண்டும், முன் செல்லும் வாகனங்களை வேகமான முந்தி செல்வதை தவிர்க்க வேண்டும், குறுக்கு சாலை அல்லது பாதசாரிகள் கடக்கும் இடங்களில் மெதுவாக செல்ல வேண்டும், வழித்தடம் மாறும் முன் முறையான வாகன செய்கையை செய்ய வேண்டும், தேவையின்றி ஒலிப்பானை பயன்படுத்த கூடாது என்பன போன்ற முக்கிய விதிகளை கடைபிடிக்க வாகன ஓட்டிகள் வலியுறுத்தப்பட்டனர். அதேபோல் பயணிகள் ஓடும் பேருந்தில் ஏறவோ, இறங்கவோ கூடாது, படிக்கட்டு பயணத்தை தவிர்க்க வேண்டும், பஸ்சிலிருந்து தலை, கைகளை வெளியே நீட்டக்கூடாது இவை அனைத்தையும் பொதுமக்கள் கடைபிடிக்க வலியுறுத்தப்பட்டனர்.

அதேபோல் பாதசாரிகள் நாலாபுறமும் பார்த்து சாலையை கடக்க வேண்டும், நடைபாதையை தவிர்த்து சாலையில் நடக்க கூடாது, சாலையை கடக்க மாற்றுத்திறனாளிகளுக்கு உதவி செய்ய வலியுறுத்தப்பட்டனர். இதைத்தொடர்ந்து திருச்சி மத்திய பேருந்து நிலையத்தில் சாலை பாதுகாப்பு விழிப்புணர்வு துண்டு பிரசுரங்களை பொதுமக்களுக்கு வட்டாரப் போக்குவரத்து அலுவலர்கள் நடராஜன் (திருச்சி மேற்கு), சுரேஷ் பாபு (ரங்கம்) ஆகியோர் வழங்கினர். திருச்சி மண்டல பொது மேலாளர் முத்துகிருஷ்ணன், துணை மேலாளர்கள் சுரேஷ் குமார் (வணிகம்), சாமிநாதன்(தொழில்நுட்பம்), ரவி பணியாளர் மற்றும் சட்டம், ராஜேந்திரன் (திருச்சி ) மற்றும் போக்குவரத்து கழக பணியாளர்கள் மற்றும் பொதுமக்கள் உள்ளிட்ட பலர் கலந்து கொண்டனர்.

The post தேசிய சாலை பாதுகாப்பு வாரவிழா கடைபிடிப்பு; ஓடும் பேருந்தில் ஏறவோ, இறங்கவோ கூடாது: வாகன விழிப்புணர்வு பேரணியில் அறிவுறுத்தல் appeared first on Dinakaran.