‘திராவிட மாடல்’ அரசு மீண்டும் அமைய என் பிறந்த நாளில் உறுதியேற்போம்: உதயநிதி

சென்னை: “முதல்வர் மு.க.ஸ்டாலின் தலைமையிலான ‘திராவிட மாடல்’ அரசு மீண்டும் அமைவதற்கான உறுதியை எனது பிறந்த நாளில் என்னுடன் சேர்ந்து ஏற்றுக் கொள்ளுங்கள்” என்று திமுகவினருக்கு துணை முதல்வர் உதயநிதி ஸ்டாலின் வேண்டுகோள் விடுத்துள்ளார்.

இதுகுறித்து அவர் வெளியிட்ட சமூக வலைதள பதிவில், “நவ. 27-ம் தேதி என் பிறந்த நாள் வருகிறது. இதையொட்டி, தமிழகம் முழுவதும் திமுகவினர் பல்வேறு நிகழ்ச்சிகளை நடத்தி வருகின்றனர். குறிப்பாக, ‘என் உயிரினும் மேலான’ பேச்சுப்போட்டி மூலம் தேர்ந்தெடுக்கப்பட்ட இளம் பேச்சாளர்கள் இந்த நிகழ்ச்சிகளில் பயன்படுத்தப்படுவதை அறியும்போது மகிழ்ச்சியடைகிறேன். அனுபவம் வாய்ந்த தலைமைக்கழக பேச்சாளர்களுடன் இணைந்து பங்கேற்பதன் மூலம் இளம் பேச்சாளர்கள் மேலும் பட்டை தீட்டப்படுகின்றனர்.