தடையை மீறி யாத்திரை: மதுரையில் நடிகை குஷ்பு உள்பட பாஜக-வினர் கைது 

மதுரை: அண்ணா பல்கலைக்கழக மாணவி பாலியல் வன்கொடுமை சம்பவத்தை கண்டித்து மதுரையில் தடையை மீறி நீதி யாத்திரை செல்ல முயன்ற நடிகை குஷ்பு உள்பட 500-க்கும் மேற்பட்ட பாஜக மகளிர் அணியினரை போலீஸார் கைது செய்தனர்.

சென்னை அண்ணா பல்கலைக்கழக வளாகத்தில் மாணவி பாலியல் வன்கொடுமைக்கு ஆளாக்கப்பட்ட சம்பவத்தை கண்டித்து தமிழகத்தில் எதிர்கட்சிகள் தொடர் போராட்டம் நடத்தி வருகின்றன.இந்த சம்பவத்தை கண்டித்து தமிழக பாஜக தலைவர் அண்ணாமலை தனக்கு தானே சவுக்கால் அடித்து தண்டனை கொடுத்துக் கொண்டார். இதையடுத்து பாஜக மகளிரணி சார்பில் அண்ணா பல்கலைக்கழக சம்பவத்தை கண்டித்து பாஜக தாய்மார்களின் நீதி யாத்திரை போராட்டம் அறிவிக்கப்பட்டது.