தஞ்சை மாதாகோட்டையில் பிப். 1-ம் தேதி ஜல்லிக்கட்டு

தஞ்சாவூர், ஜன. 30: தஞ்சை மாதாகோட்டையில் வரும் பிப்ரவரி 1ம் தேதி ஜல்லிக்கட்டு நடைபெறுவதை முன்னிட்டு அதற்கான முன்னேற்பாடுகள் தீவிரமாக நடைபெற்று வருகின்றன. தஞ்சை அடுத்த மாதாக்கோட்டையில் பொங்கல் விழாவை முன்னிட்டு லூர்து மாதா ஜல்லிக்கட்டு பேரவை சார்பில் பாரம்பரியமிக்க ஜல்லிக்கட்டு ஆண்டுதோறும் நடத்தப்படுவது வழக்கம். ஜல்லிக்கட்டு போட்டியானது காலை 6.30 மணிக்கு தொடங்கி மாலை 4.30 மணிக்கு முடிவு பெறும். இந்த போட்டியில் பங்கேற்க 550 காளைகளுக்கு அனுமதி வழங்கப்பட உள்ளது. ஜல்லிக்கட்டு போட்டியில் இணையதளம் மூலம் டோக்கன் பெரும் வசதி ஏற்படுத்தப்பட்டுள்ளது. நாளை (வெள்ளிக்கிழமை) இணையதளம் மூலம் போட்டியில் பங்கு பெற முன்பதிவு செய்யலாம். நேரடியாக வந்து டோக்கன் பெறும் வசதி கிடையாது. மாவட்ட நிர்வாகத்துடன் இணைந்து விழா கமிட்டி சார்பில் ஜல்லிக்கட்டு போட்டி நடைபெறுகிறது.

முதல் பரிசு பெரும் வீரருக்கு இருசக்கர வாகனமும், இரண்டாம் பரிசு பெறும் வீரர்களுக்கு சைக்கிள் மற்றும் மூன்றாம் பரிசு பெரும் வீரர்களுக்கு பாத்திரங்கள் டைனிங் டேபிள் பரிசாக வழங்கப்படுகிறது. தற்போது அதற்கான முன்னேற்பாடுகள் தீவிரமாக நடைபெற்று வருகிறது. மைதானத்தில் இருபுறங்களிலும் இரும்பு தடுப்பு கம்பிகள் அமைக்கப்பட்டு வருகிறது. காளைகள், பார்வையாளர் பகுதிக்குள் சென்றுவிடாதபடி தடுக்க இரும்பு கம்பிகள், சவுக்கு கட்டைகளால் ஆன தடுப்புகள் அமைக்கப்பட்டு வருகிறது. முக்கிய இடங்களில் கண்காணிப்பு கேமராக்கள் பொருத்தப்படவுளளன. ஜல்லிக்கட்டை முன்னிட்டு காளைகள் திறந்துவிடப்படும் வாடிவாசலில் இருந்து 100 மீட்டர் தூரம் வரை 1 அடி உயரத்துக்கு தென்னை நார்கள் பரப்பப்பட உள்ளது. ஜல்லிகட்டில் பங்கேற்க தஞ்சை, திருச்சி, அரியலூர், புதுக்கோட்டை, நாமக்கல் உள்ளிட்ட பல்வேறு மாவட்டங்களில் இருந்து காளைகள் வருவது வழக்கம்.

மேலும் காளையை அடக்க வரும் வீரர்கள் மது அருந்தி உள்ளனரா? புகையிலை பொருட்கள் வைத்திருக்கிறார்களா? என்ற பரிசோதனைக்கு பிறகு அனுமதிக்கப்படுவார்கள். மேலும் காளைகளுக்கு கால்நடை பராமரிப்பு துறை சார்பில் கால்நடை டாக்டர்கள் பரிசோதனை செய்வார்கள். மாட்டின் உரிமையாளர் இணையதளம் வழியாக மட்டுமே டோக்கனை பதிவு செய்ய வேண்டும். டோக்கன் முறைப்படி வரிசையாக தான் காளைகள் உள்ளே அனுமதிக்கப்படும். மாடுபிடி வீரர்கள் நேரடியாக இணையதளம் வழியாக பதிவு செய்யவேண்டும். காட்டு மாடுகளுக்கும், இரண்டு கயிறுகளுக்கு மேல் கட்டி வரும் மாடுகளுக்கும் அனுமதி கிடையாது. விழா குழுவிற்கும், மாவட்ட நிர்வாகத்திற்கும், மாடுபிடி வீரர்கள் மற்றும் பொதுமக்கள் முழு ஒத்துழைப்பு அளித்திட வேண்டும் என விழா கமிட்டி சார்பாக தெரிவிக்கப்பட்டுள்ளது.

The post தஞ்சை மாதாகோட்டையில் பிப். 1-ம் தேதி ஜல்லிக்கட்டு appeared first on Dinakaran.