டெஸ்ட் பேட்டிங் தரவரிசை 6ம் இடத்தை பிடித்த சுப்மன் கில்

லண்டன்: ஐசிசி டெஸ்ட் போட்டிகளுக்கான பேட்டிங் தரவரிசைப் பட்டியலில், இந்திய அணி கேப்டன் சுப்மன் கில் 15 நிலை உயர்ந்து 6ம் இடத்தை பிடித்துள்ளார். சமீபத்தில் முடிந்த இங்கிலாந்து அணியுடனான 2வது டெஸ்டில் இந்திய அணி மகத்தான வெற்றி பெற்று பல்வேறு சாதனைகளை படைத்தது. அந்த போட்டியின் இரு இன்னிங்ஸ்களிலும் அசத்தலாய் ஆடிய இந்திய கேப்டன் சுப்மன் கில் 430 ரன் குவித்து பல்வேறு சாதனைகளை தவிடுபொடியாக்கினார்.

வியப்பில் ஆழ்த்தும் வகையிலான அவரது பேட்டிங் எழுச்சியால், ஐசிசி டெஸ்ட் போட்டிகளுக்கான பேட்டிங் தர வரிசையில், தன் வாழ்நாளில் அதிகபட்சமாக 807 புள்ளிகளை கில் பெற்றுள்ளார். இதன் மூலம், அப் பட்டியலில் 15 நிலை உயர்ந்து 6ம் இடத்தை கில் பெற்று சாதனை படைத்துள்ளார். அந்த போட்டியின் 2வது இன்னிங்சில் 158 ரன் விளாசிய இங்கிலாந்து பேட்ஸ்மேன் ஹேரி புரூக், 886 புள்ளிகளுடன் ஒரு நிலை உயர்ந்து முதலிடத்தை பிடித்துள்ளார்.

அதேபோல், 2 இன்னிங்ஸ்களிலும் முறையே, 89 மற்றும் 69 ரன் எடுத்த இந்திய ஆல் ரவுண்டர் ரவீந்திர ஜடேஜா, 6 நிலை உயர்ந்து 39ம் இடத்தை பிடித்துள்ளார். இங்கிலாந்தின் அதிரடி ஆட்டக்காரர் ஜேமி ஸ்மித், 16 நிலை உயர்ந்து 10ம் இடத்துக்கு சென்றுள்ளார். இந்திய வீரர் ஜெய்ஸ்வால், 858 புள்ளிகளுடன் மாற்றமின்றி 4ம் இடத்தில் உள்ளார். ஜிம்பாப்வே அணிக்கு எதிரான டெஸ்டில் 369 ரன் விளாசிய தென் ஆப்ரிக்கா வீரர் வியான் முல்டர், 34 நிலை உயர்ந்து 22ம் இடத்தை பிடித்து அசத்தியுள்ளார்.

The post டெஸ்ட் பேட்டிங் தரவரிசை 6ம் இடத்தை பிடித்த சுப்மன் கில் appeared first on Dinakaran.