டெல்லி சென்று திரும்பிய மாணவர்களுக்கு உற்சாக வரவேற்பு

ராமநாதபுரம்: டெல்லி குடியரசு தின விழாவில் கலை பண்பாட்டு நிகழ்ச்சியில் கலந்து கொண்டு ராமநாதபுரம் திரும்பிய மாணவர்களுக்கு உற்சாக வரவேற்பு அளிக்கப்பட்டது. டெல்லி குடியரசு தின விழாவில் மத்திய கலை பண்பாட்டுத் துறை, புதுடெல்லி சங்கீத் நாடக அகாடமி சார்பாக 60 கரகாட்ட கலைஞர்கள் பங்கேற்றனர்.

இதில் தமிழ்நாடு கலைபண்பாட்டுத் துறை ராமநாதபுரம் மாவட்ட பகுதிநேர நாட்டுப்புற கலைப் பயிற்சி மாணவர்கள் நர்சிங் மாணவி ஜெயஸ்ரீ, கூட்டுறவு பட்டயபடிப்பு மாணவர் ஹரிஸ்ராகுல், பரமக்குடி அரசு கலைக் கல்லூரி முன்றாம் ஆண்டு இயற்பியல் மாணவர் ஆகாஷ் ஆகியோர் இந்தியா கேட் வாயிலில் நடந்த இந்தியாவில் அனைத்து மாநில நாட்டுப்புற கலைஞர்கள் 5000 பேர் பங்கேற்ற ராஜாபாத் என்ற நிகழ்ச்சியில் குடியரசு தலைவர் திரெளபதி முர்மு மற்றும் பிரதமர் நரேந்திர மோடி முன்பாக தமிழ்நாட்டின் பாரம்பரியத்தை பறைசாற்றும் கரகாட்டம் நிகழ்ச்சியை நிகழ்த்தினர்.

நிகழ்ச்சியை முடித்துவிட்டு ரயிலில் நேற்று காலையில் ராமநாதபுரத்திற்கு வந்த மாணவர்களுக்கு மாலை அணிவித்து, ஆரத்தி எடுத்தும், சிலம்பாட்டம், ஒயிலாட்டம், பாரம்பரிய மேளம், தாளங்களுடன் உற்சாக வரவேற்பு அளிக்கப்பட்டது.

The post டெல்லி சென்று திரும்பிய மாணவர்களுக்கு உற்சாக வரவேற்பு appeared first on Dinakaran.