டிக்கெட் வாங்க பணம் இல்லாததால் ரயில் சக்கரங்களுக்கு நடுவில் 250 கி.மீ பயணித்த இளைஞர்: மத்திய பிரதேச அதிகாரிகள் அதிர்ச்சி

ஜபல்பூர்: மத்தியபிரதேசத்தில் ரயில் பெட்டியின் அடியில் சக்கரங்களுக்கு நடுவே 250 கி.மீ. தூரம் பயணித்த ஒருவரை பிடித்து போலீசார் விசாரணை செய்து வருகின்றனர். மத்திய பிரதேச மாநிலம் ஜபல்பூர் ரயில் நிலையத்தில் ரயில் பெட்டிகளின் கீழ் ரயில்வே ஊழியர்கள் வழக்கமான ஆய்வு மேற்கொண்டனர். அப்போது ஒரு ரயிலில், ஒரு பெட்டியின் கீழே சக்கரங்களுக்கு நடுவில் ஒருவர் மறைந்திருப்பதை கண்டு அதிர்ச்சியடைந்தனர். உடனடியாக அந்த நபரை வெளியேறுமாறு அறிவுறுத்தினர். பின்னர் அவரை பிடித்து விசாரித்தனர். இதில் அந்த நபர், இடார்சியில் இருந்து 250 கி.மீ. தூரம், அதாவது 4 மணி நேரத்துக்கும் மேலாக மேற்கண்ட ரயில் பெட்டிகளின் கீழ் பயணித்ததாக கூறியதை கேட்டு மேலும் அதிர்ந்தனர். இதுகுறித்து ரயில்வே அதிகாரிகள் கூறுகையில், ‘புனே – தானாபூர் விரைவு ரயிலின் ஏசி-4 பெட்டியின் கீழே வழக்கத்துக்கு மாறான அசைவுகளை ரயில்பெட்டி மற்றும் வேகன் துறையை சேர்ந்த ஊழியர்கள் கவனித்தனர்.

இதையடுத்து ரயிலை நிறுத்துமாறு லோகோ பைலட்டிடம் கூறினர். சக்கரங்களுக்கு நடுவில் ட்ராலி பிரிவில் பதுங்கியிருந்த நபரை வெளியே வரவழைத்தனர். பிறகு அவரை பிடித்து ஆர்பிஎப் போலீசாரிடம் ஒப்படைத்தனர். அவர்கள் ெதாடர்ந்து விசாரணை நடத்தி வருகின்றனர்’ என்றார். சம்பந்தப்பட்ட வாலிபரிடம் போலீசார் நடத்திய விசாரணையில், ஜபல்பூர் வருவதற்கு ரயில் டிக்கெட் வாங்க பணம் இல்லாததால், இவ்வாறு ரயில் சக்கரங்களின் கீழ் படுத்துக் கொண்டே வந்ததாக அந்த நபர் கூறியுள்ளார். அவரது பதில்களில் அவர் மனநலம் பாதிக்கப்பட்டவராக இருக்கலாம் என்று அதிகாரிகள் தெரிவித்தனர். அந்த நபரிடம் ஜபல்பூர் ஆர்பிஎப் போலீசார் தொடர்ந்து விசாரணை மேற்கொண்டுள்ளனர்.

The post டிக்கெட் வாங்க பணம் இல்லாததால் ரயில் சக்கரங்களுக்கு நடுவில் 250 கி.மீ பயணித்த இளைஞர்: மத்திய பிரதேச அதிகாரிகள் அதிர்ச்சி appeared first on Dinakaran.