டாக்டர் ராமதாசுடன் டிட்டோ ஜாக் அமைப்பினர் சந்திப்பு

சென்னை,

பாட்டாளி மக்கள் கட்சியின் நிறுவனர் டாக்டர் ராமதாசை தமிழ்நாடு தொடக்கப்பள்ளி ஆசிரியர் இயக்கங்களின் கூட்டு நடவடிக்கைக் குழுவான டிட்டோ ஜாக் அமைப்பைச் சேர்ந்த நிர்வாகிகள் இன்று காலை விழுப்புரத்தில் உள்ள தைலாபுரம் தோட்டத்தில் சந்தித்துப் பேசினார்கள்.

இந்த சந்திப்பின்போது தமிழ்நாடு தொடக்கப்பள்ளி ஆசிரியர்களின் நீண்ட நாள் கோரிக்கைகளான பழைய ஓய்வூதியத் திட்டம், ஊதிய முரண்பாடுகளைக் களைதல், ஆசிரியர்களின் பதவி உயர்வுக்கு பெரும் தடையாக இருக்கும் அரசாணை 243-ஐ நீக்குதல், உயர்கல்வி கற்பதற்கான ஊக்கத்தொகையை மீண்டும் வழங்குதல், ஈட்டிய விடுப்பு ஒப்படைக்கும் உரிமை, அனைத்து ஆசிரியர் பணியிடங்களையும் நிரப்ப வேண்டும், ஆசிரியர் தகுதித் தேர்வை தேவையற்றதாக அறிவித்து, அதன் காரணமாக வழங்கப்படாமல் இருக்கும் தற்போதைய ஆசிரியர்களின் பதவி உயர்வை வழங்க வேண்டும் என்பன உள்ளிட்ட 15 அம்சக் கோரிக்கைகளை நிறைவேற்ற தமிழக அரசை வலியுறுத்த வேண்டும் என்று டாக்டர் ராமதாசிடம் அவர்கள் கோரிக்கை வைத்தனர்.

கடந்த காலங்களில் ஆசிரியர்களின் கோரிக்கைகளுக்காக தொடர்ந்து குரல் கொடுத்து வருவதற்காகவும் டாக்டர் ராமதாசுக்கு ஆசிரியர் சங்கத்தினர் நன்றி தெரிவித்துக் கொண்டனர். டிட்டோ ஜாக் அமைப்பினர் கோரிக்கைகள் மிகவும் நியாயமானவை என்று கூறிய டாக்டர் ராமதாஸ், ஆசிரியர்களின் 15 அம்சக் கோரிக்கைகளையும் உடனடியாக நிறைவேற்ற வேண்டும் என்று தமிழக அரசை வலியுறுத்துவதாகவும் உறுதியளித்தார்.

இந்த சந்திப்பில் தமிழ்நாடு தொடக்கப்பள்ளி ஆசிரியர் இயக்கங்களின் கூட்டு நடவடிக்கைக் குழுவின் (டிட்டோ ஜாக்) ஈ. இராஜேந்திரன், கே.பி.ரக்ஷித், அ.வின்சென்ட் பால்ராஜ், ச.மயில், இரா.தாஸ், சி.சேகர், சு.குணசேகரன், கோ.காமராஜ், சி.ஜெகநாதன், டி.ஆர்.ஜான்வெஸ்லி, சமூக முன்னேற்ற சங்கத்தின் பொதுச்செயலாளர் ஏழுமலை உள்ளிட்டோர் உடனிருந்தனர்.