‘டங்ஸ்டன்’ தாக்கம்: வேளாண் மண்டலம் ஆகுமா முல்லைப் பெரியாறு பாசனப் பகுதிகள்?

மதுரை: “எதிர்காலத்தில் டங்ஸ்டன் போன்ற திட்டங்களால் அச்சுறுத்தல் ஏற்படாமல் இருக்க முல்லைப் பெரியாறு பாசன பகுதிகள் பாதுகாக்கப்பட்ட வேளாண் மண்டலமாக அறிவிக்கப்பட மத்திய, மாநில அரசுகள் நடவடிக்கை எடுக்க வேண்டும்,” என்று டங்ஸ்டன் சுரங்கத் திட்ட எதிர்ப்பு மக்கள் கூட்டமைப்பினர் வலியுறுத்தியுள்ளனர்.

இது குறித்து அதன் நிர்வாகி தமிழ்தாசன் கூறியது: “மேலூர் பகுதியில் உள்ள பசுமையான மலைகளையும், பாறைக் குன்றுகளையும் கனிமங்களை வழங்கும் குவாரிகளாக மட்டுமே அரசுகள் அவற்றைப் பார்க்க கூடாது. மேலூர் பகுதியில் உள்ள ஒவ்வொரு மலைக் குன்றும் வரலாறு மற்றும் பல்லுயிரிய முக்கியத்துவம் வாய்ந்த பகுதியாகும். அதற்கு அரிட்டாபட்டி - மீனாட்சிபுரம் பல்லுயிரிய மரபு தளம் என்பது ஒரு சிறிய சான்றாகும்.