சின்னசேலம் அருகே டயர் வெடித்ததில் மினிவேன் கவிழ்ந்து சாலையில் வழிந்தோடிய எண்ணெய்

*போலீசார் நடவடிக்கையால் விபத்து தடுப்பு

சின்னசேலம் : சின்னசேலம் அருகே டயர் வெடித்து மினிவேன் கவிழ்ந்ததால் அதில் ஏற்றி வந்த சமையல் எண்ணெய் தரையில் வழிந்தோடியது. சேலம் மாவட்டம் ஆத்தூரில் இருந்து சுமார் 4.5 டன் எடையுள்ள சமையல் எண்ணெய் ஏற்றிக்கொண்டு மினிவேன் கள்ளக்குறிச்சி நோக்கி வந்தது.

இந்த வேனை சங்கராபுரம் அருகே இளையனார்குப்பத்தை சேர்ந்த வெங்கடேசன் (25) என்பவர் ஓட்டி வந்தார். இந்த மினிவேன் நேற்று கள்ளக்குறிச்சி புறவழிச்சாலையில் இந்திலி முனியப்பர் கோயில் அருகே வந்தபோது திடீரென டயர் வெடித்ததால் சாலையோரம் கவிழ்ந்தது.

இதனால் வேனில் இருந்த சமையல் எண்ணெய் கேன், பாக்கெட்டுகள் உடைந்தது. இதில் சுமார் 65 லிட்டர் சமையல் எண்ணெய் கீழே கொட்டி சாலையில் வழிந்தோடியது. இந்த விபத்தில் வேனை ஓட்டி வந்த வெங்கடேசன் லேசான காயத்துடன் உயிர் தப்பினார்.

இதுகுறித்து தகவலறிந்த நெடுஞ்சாலைத்துறை ரோந்து வாகன சப்-இன்ஸ்பெக்டர் சுப்பிரமணியன் உள்ளிட்ட போலீசார் சம்பவ இடத்துக்கு விரைந்து சென்று வாகனத்தை அப்புறப்படுத்தி போக்குவரத்தை சரி செய்தனர். கள்ளக்குறிச்சி நெடுஞ்சாலைத்துறை ரோந்து வாகன போலீசார் துரிதமாக செயல்பட்டதால் விபத்து சம்பவங்களும் தடுக்கப்பட்டது.

The post சின்னசேலம் அருகே டயர் வெடித்ததில் மினிவேன் கவிழ்ந்து சாலையில் வழிந்தோடிய எண்ணெய் appeared first on Dinakaran.