சன்ரைசர்சுக்கு எதிராக கொல்கத்தா அபார வெற்றி: ரகுவன்சி, வெங்கடேஷ் ஐயர் அரைசதம்

கொல்கத்தா: ஐபிஎல் டி20 தொடரில் சன்ரைசர்ஸ் ஐதராபாத் அணிக்கு எதிரான லீக் போட்டியில் கொல்கத்தா நைட் ரைடர்ஸ் 80 ரன் வித்தியாசத்தில் வென்றது. கொல்கத்தா ஈடன் கார்டன் மைதானத்தில் நேற்றிரவு நடந்த இப்போட்டியில், டாஸ் வென்ற சன்ரைசர்ஸ் கேப்டன் பேட் கம்மின்ஸ், பவுலிங்கை தேர்வு செய்தார்.

கொல்கத்தா அணியின் தொடக்க வீரர்களாக குயின்டன் டி காக்-சுனில்நரைன் களமிறங்கினர். 2வது ஓவரை வீசிய கம்மின்ஸ், டி காக்கை 1 ரன்னில் வெளியேற்றினார். 3வது ஓவரில் முகமது ஷமி பந்தில் நரைன் 7 ரன்னில் கீப்பர் க்ளாசெனிடம் கேட்ச் கொடுத்து அவுட் ஆனார். 3வது விக்கெட்டிற்கு கொல்கத்தா கேப்டன் ரஹானே-ரகுவன்சி ஜோடி நிலைத்து நின்று ஆடியது. சிக்சர், பவுண்டரிகளாக விளாசிய நிலையில், 11வது ஓவரில் ரஹானே 38 ரன்னில் ஜீஷன் அன்சாரி பந்தில் கீப்பர் க்ளாசெனிடம் கேட்ச் கொடுத்து வெளியேறினார். மறுமுனையில் நிலைத்து ஆடிய ரகுவன்சி 30 பந்தில் 50 ரன் (அரை சதம்) எடுத்தார். கமிந்துமென்டீஸ் வீசிய அடுத்த பந்தில், ரகுவன்சி விக்கெட்டை பறிகொடுத்தார்.

அவரது கேட்சை ஹர்ஷல் பட்டேல் அபாரமாக பிடித்தார். 5வது விக்கெட்டிற்கு ஜோடி சேர்ந்த வெங்கடேஷ் ஐயர்-ரிங்குசிங் ஜோடி, சன்ரைசர்ஸ் பந்துவீச்சை நாலாபுறமும் அடித்து ஆடினர். இதனால் ரன் ரேட் வேகமாக உயர்ந்தது. கடைசி ஓவரில் அதிரடியாக ஆடிவந்த வெங்கடேஷ் ஐயர் 60 ரன்னில் ஆட்டமிழந்தார். இறுதி ஓவரின் கடைசி பந்தில் ரஸல் 1 ரன்னில் ரன்அவுட் ஆனார். இதனால், 20 ஓவர் முடிவில் கொல்கத்தா 6 விக்கெட் இழப்பிற்கு 200 ரன் குவித்தது.

ரிங்கு சிங் அவுட் ஆகாமல் 32 ரன்னில் களத்தில் இருந்தார். சன்ரைசர்ஸ் தரப்பில் முகமது ஷமி, பேட் கம்மின்ஸ், கிஷன் அன்சாரி, கமிந்து மென்டிஸ், ஹர்ஷல்பட்டேல் தலா ஒரு விக்கெட் வீழ்த்தினர்.
அடுத்து 201 ரன்னை வெற்றி இலக்கை துரத்திய சன்ரைசர்ஸ் ஐதராபாத் 16.4 ஓவரில் 120 ரன்களுக்கு ஆல் அவுட்டாகி 80 ரன் வித்தியாசத்தில் தோற்றது. அதிகபட்சமாக க்ளாசென் 33 ரன் எடுத்தார். கொல்கத்தா அணியில் சிறப்பாக பந்துவீசிய வருண் சக்கரவர்த்தி, அரோரா தலா 3 விக்கெட் வீழ்த்தினர்.

The post சன்ரைசர்சுக்கு எதிராக கொல்கத்தா அபார வெற்றி: ரகுவன்சி, வெங்கடேஷ் ஐயர் அரைசதம் appeared first on Dinakaran.