கூட்டணிக்கு சம்மதித்த பிறகும் நெருக்கடி கொடுக்கும் பாஜக: மோடியை சந்திக்க மறுக்கும் எடப்பாடி

* ஓ.பன்னீர்செல்வம், டிடிவி, அண்ணாமலை மட்டுமே சந்திப்பு

சென்னை: கூட்டணிக்கு சம்மதித்த பிறகும் பாஜக நெருக்கடி கொடுப்பதால், மதுரை வரும் மோடியை சந்திக்க எடப்பாடி பழனிச்சாமி மறுத்து விட்டார். இது அதிமுக, பாஜக வட்டாரத்தில் பரபரப்பை ஏற்படுத்தியுள்ளது. பிரதமர் மோடி இலங்கையில் உள்ள அனுராதாபுரத்தில் இருந்து நாளை காலை 10.40 மணிக்கு ஹெலிகாப்டரில் புறப்படுகிறார். ராமேஸ்வரத்தில் உள்ள மண்டபம் பகுதிக்கு 11.45 மணிக்கு வருகிறார். அவரை தமிழக அமைச்சர் தங்கம் தென்னரசு வரவேற்கிறார். வரவேற்பு முடிந்ததும் 11.50 மணிக்கு மண்டபத்தில் இருந்து பாம்பன் செல்கிறார். அங்கு 12.25 மணிக்கு ரயில்வே பாலத்தை திறந்து வைக்கிறார். பின்னர் 12.40 மணிக்கு ராமநாதசுவாமி கோயிலுக்குச் சென்று சாமி தரிசனம் செய்கிறார். சிறப்பு பூஜைகளையும் செய்கிறார். அதைத் தொடர்ந்து 1.20 மணிக்கு கோயிலில் இருந்து புறப்பட்டு 1.30 மணிக்கு தமிழ்நாடு டூரிசம் மைதானத்துக்கு வருகிறார்.

அங்கு பல்வேறு திட்டங்களுக்கு அடிக்கல் நாட்டுகிறார். பின்னர் 2.55 மணிக்கு மண்டபம் செல்கிறார். 3 மணிக்கு ஹெலிகாப்டரில் மதுரை செல்கிறார். மதுரைக்கு 3.50 மணிக்கு விமானநிலையம் வந்தடைகிறார். அங்கு முக்கிய நிர்வாகிகளை சந்திக்கிறார். அப்போது எடப்பாடி பழனிச்சாமியை எப்படியாவது மோடியை சந்திக்க வைக்க வேண்டும் என்று பாஜக மேலிட தலைவர்கள் தீவிரம் காட்டினர். ஆரம்பத்தில் எடப்பாடி பழனிச்சாமி சம்மதம் தெரிவித்திருந்தார். ஆனால், அமித்ஷாவை சந்தித்த உடனேயே தன் கட்சியைச் சேர்ந்த செங்கோட்டையனை டெல்லிக்கு அழைத்து நிர்மலா சீதாராமன், அமித்ஷா ஆகியோர் பேசியது அதிமுகவில் பரபரப்பை ஏற்படுத்தியது. அதைத் தொடர்ந்து தம்பித்துரை, சி.வி.சண்முகம் ஆகியோரையும் சந்தித்துப் பேசினர். இது அதிமுகவில் பரபரப்பை ஏற்படுத்தியது. கூட்டணிக்கு அமித்ஷாவிடம் எடப்பாடி பழனிச்சாமி சம்மதம் தெரிவித்திருந்தார்.

ஆனாலும் கட்சியை உடைக்கும் பணியை பாஜக செய்தது எடப்பாடிக்கு கடும் அதிர்ச்சியை கொடுத்தது. அதோடு ஓ.பன்னீர்செல்வம், டிடிவி தினகரன், அண்ணாமலை ஆகியோரை சந்திக்க மோடி நேரம் ஒதுக்கியிருந்தார். இந்த தகவலும் எடப்பாடி பழனிச்சாமிக்கு தெரியவந்தது. இதனால் மோடியை வரிசையில் அவர்களுடன் நின்று சந்திக்க விரும்பவில்லை. இதனால் சென்னையில் இருக்கும் எடப்பாடி பழனிச்சாமி, மோடியை சந்திப்பதை தவிர்த்து
விட்டார்.

The post கூட்டணிக்கு சம்மதித்த பிறகும் நெருக்கடி கொடுக்கும் பாஜக: மோடியை சந்திக்க மறுக்கும் எடப்பாடி appeared first on Dinakaran.