குடியாத்தத்தில் அதிமுக நாளை ஆர்ப்பாட்டம்: வெற்று விளம்பரத்துக்கான மலிவான அரசியல் - அமைச்சர் காந்தி குற்றச்சாட்டு

சென்னை: வேலூர் சரக கைத்தறி நெசவாளர்களின் கோரிக்கைகளை நிறைவேற்றக்கோரி அதிமுக சார்பில் 28-ம் தேதி (நாளை) குடியாத்தத்தில் கண்டன ஆர்ப்பாட்டம் நடைபெறும் என எதிர்கட்சித் தலைவர் பழனிசாமி அறிவித்திருப்பது வெற்று விளம்பரத்துக்கான மலிவான அரசியல் என கைத்தறித் துறை அமைச்சர் காந்தி குற்றம்சாட்டியுள்ளார்.

இதுகுறித்து நேற்று அவர் வெளியிட்ட செய்திக்குறிப்பில் கூறியிருப்பதாவது: வேலூர் சரகம், குடியாத்தம் பகுதியில், 34 கைத்தறி நெசவாளர் கூட்டுறவு சங்கங்கள் செயல்பட்டு வருகின்றன. இச்சங்கங்களில் லுங்கி ரகங்கள் உற்பத்தி செய்யப்படுகின்றன. தீபாவளி, கிறிஸ்துமஸ், பொங்கல் பண்டிகைகளின்போது வெளிச்சந்தையில் விற்பனை வரவேற்பு அதிகமாக இருக்கும்.