ஐஆர்சிடிசி இணையதளம் மோசம் தட்கல் டிக்கெட் வாய்ப்பு 2014ல் 90%, 2025ல் வெறும் 1-5%: ஆய்வில் பயணிகள் தாறுமாறாக கதறல்

ஐஆர்சிடிசி இணைதளம் மோசமாக உள்ளதாக பயணிகள் கருத்து தெரிவித்துள்ளனர். தட்கல் டிக்கெட் என்பது கடைசி நிமிட பயணத் திட்டங்களைக் கொண்ட பயணிகளுக்கு உதவுவதற்காக அறிமுகப்படுத்தப்பட்டது. இந்த திட்டத்தின் கீழ், ஏசி மற்றும் ஏசி அல்லாத வகுப்புகளில் உள்ள இருக்கைகள் முன்கூட்டியே புக் செய்யப்படுகின்றன. இந்த திட்டம் அவசர ரயில் முன்பதிவுகளை எளிதாகவும், வெளிப்படையாகவும் செய்வதற்காக உருவாக்கப்பட்டது. இதன் நோக்கம் ஆன்லைன் முன்பதிவு மூலம் அனைத்து பயணிகளுக்கும் நியாயமான அணுகலை உறுதி செய்வதுமாகும். இருப்பினும், பல பயணிகள் இப்போது ஆன்லைனில் தட்கல் டிக்கெட்டை பெறுவது கிட்டத்தட்ட சாத்தியமற்றது என்று கூறுகின்றனர். சரியான நேரத்தில் உள்நுழைந்து, விரைவாக பணம் செலுத்தினாலும், டிக்கெட்டுகள் பெரும்பாலும் முன்பதிவு செய்யப்படுவதில்லை.

அதற்கு பதிலாக, பயணிகள் காத்திருப்பு பட்டியலில் இருப்பவர்களாகவோ அல்லது டிக்கெட் இல்லாமலோ விடப்படுகின்றனர். 2019 முதல் 2024 வரை, இந்திய ரயில்வே சரக்கு மூலம் ரூ.7.02 லட்சம் கோடியும், பயணிகள் மூலம் ரூ.2.41 லட்சம் கோடியும் சம்பாதித்தது. இதில் பெரும் பகுதி தட்கல் மற்றும் பிரீமியம் தட்கல் டிக்கெட்டுகளில் இருந்து வந்தது. இந்த டிக்கெட் வகைகள் வழக்கமான கட்டணத்தை விட மூன்று மடங்கு அதிகமாக செலவாகும். இது ரயில்வேக்கு அதிக வருமானத்தை தருகிறது, ஆனால் முன்பதிவு செயல்முறை மிகவும் ஏமாற்றமளிக்கும் போது, இது பயணிகளுக்கு ஒரு சுமையாக உள்ளது. 2015ல், வழக்கமான டிக்கெட் முன்பதிவு பற்றிய ஒத்த குறைகளை தொடர்ந்து, ரயில்வே அமைச்சகம் விசாரணை நடத்தியது. சில முகவர்களும் ரயில்வே ஊழியர்களும் புனையப்பட்ட பெயர்களை பயன்படுத்தி பயணிகளின் இருக்கைகளை திருடியது கண்டறியப்பட்டது.

பின்னர் பெயர்கள் மாற்றப்பட்டு, முகவர்கள் டிக்கெட்டுகளை உயர்ந்த விலையில் விற்றனர். அந்த பிரச்னை சரி செய்யப்பட்டது, ஆனால் இப்போது பயணிகள் மீண்டும் இதேபோன்ற ஒரு பிரச்னை நடப்பதாக புலம்பி வருகின்றனர். அதாவது, ஒரு பயணி 2014ல் தட்கல் டிக்கெட் பெறுவதற்கான வாய்ப்பு 90%க்கும் மேல் இருந்தது. இப்போது, அது வெறும் 1-5 சதவீதமாக குறைந்துவிட்டது. அதாவது சீர்த்திருத்தங்களுக்கு பின் ஐஆர்சிடிசி இணையதளம் குறித்து தேசிய கருத்துக்கணிப்பில் 396 மாவட்டங்களில் இருந்து 55,000க்கும் மேற்பட்ட பதில்கள் சேகரிக்கப்பட்டன. இதில் பல ஆச்சரியமான பதில்கள் கிடைத்துள்ளது. அதில், கடந்த ஒரு வருடத்தில் 10-ல் 4 பயணிகள் தட்கல் டிக்கெட்டை முன்பதிவு செய்ய முடியவில்லை. வெறும் 10 %பேர் எப்போதும் வெற்றிகரமாக முன்பதிவு செய்தனர். 29% பேர் 25%க்கும் குறைவாகவே வெற்றி பெற்றதாகக் கூறினர்.

மற்றொரு 29 % பேர் ஒரு தட்கல் டிக்கெட்டையும் முன்பதிவு செய்ய முடியவில்லை என்று கூறினர். 10ல் 7 பேர் முன்பதிவு திறந்தவுடன் பிரச்னைகளை எதிர்கொண்டனர். 73 %பேர் முதல் நிமிடத்திற்குள் அனைத்து டிக்கெட்டுகளும் முன்பதிவு செய்யப்பட்டுவிட்டதாகக் கூறினர். மற்றொரு 73 %பேர் டிக்கெட்டுகள் கிடைப்பதாக தோன்றினாலும், பணம் செலுத்தும் போது மறைந்துவிட்டதாகக் கூறினர். வெறும் 14 % பேர் எந்த பிரச்னையும் இல்லை என்று கூறினர். தட்கல் டிக்கெட்டைப் பெறுவதற்கு சிறந்த வழி எது?தட்கல் டிக்கெட்டை எவ்வாறு பெற விரும்புகிறார்கள் என்று கேட்கப்பட்டபோது: 32 % பேர் பயண முகவர் மூலம் செல்வதாகக் கூறினர். 8%பேர் பல கணக்குகள் மற்றும் சாதனங்களைப் பயன்படுத்துவதாகக் கூறினர். 40 % பேர் இன்னும் வழக்கமான ஆன்லைன் முன்பதிவு முறையை முயற்சிக்கின்றனர்.

6 %பேர் நேரடியாக ரயில் நிலையத்திற்கு செல்கின்றனர். 7 % பேர் எம்பிக்கள், எம்எல்ஏக்கள் அல்லது ரயில்வே ஊழியர்களிடம் உதவி கேட்க முயற்சிக்கின்றனர். தட்கல் முன்பதிவு அவசர பயணத்திற்கு விரைவான மற்றும் நியாயமான தீர்வாக இருக்க வேண்டும். ஆனால் தற்போதைய முறை பல பயணிகளை ஏமாற்றமடையச் செய்கிறது, காத்திருப்பு பட்டியலில் வைக்கிறது, அல்லது செலவு செய்ய வைக்கிறது. முகவர்களுக்கு நியாயமற்ற முன்னுரிமை உள்ளது என்ற நம்பிக்கை அதிகரித்து வருவது கோபத்தை மட்டுமே அதிகரிக்கிறது என பயணிகள் தாறுமாறாக குமுறி வருகின்றனர்.

The post ஐஆர்சிடிசி இணையதளம் மோசம் தட்கல் டிக்கெட் வாய்ப்பு 2014ல் 90%, 2025ல் வெறும் 1-5%: ஆய்வில் பயணிகள் தாறுமாறாக கதறல் appeared first on Dinakaran.