என்எல்சி சங்க அங்கீகார தேர்தலில் எண் 6ல் வாக்களித்து தொமுசவை தனிப்பெரும் சங்கமாக உருவாக்கி தர வேண்டும்: தொழிலாளர்களுக்கு முதல்வர் மு.க.ஸ்டாலின் வேண்டுகோள்

சென்னை: நெய்வேலி நிலக்கரி நிறுவனத்தில் நடைபெற உள்ள ரகசிய வாக்கெடுப்பில் தொழிலாளர் முன்னேற்றச் சங்கத்தை எண்.6ல் வாக்களித்துத் தனிப்பெரும் சங்கமாக உருவாக்கித் தர வேண்டும் என்று மு.க.ஸ்டாலின் வேண்டுகோள் விடுத்துள்ளார். இதுகுறித்து, திமுக தலைவரும், முதல்வருமான மு.க.ஸ்டாலின் நேற்று வெளியிட்ட அறிக்கை: நான்கு ஆண்டுகளுக்கு ஒருமுறை என்.எல்.சி. பொதுத்துறை நிறுவனத்தில் நடைபெறுகின்ற சங்க அங்கீகாரத்திற்கான ரகசிய வாக்கெடுப்பு தேர்தல் நாளை (இன்று) நடைபெற உள்ளது. ஒன்றிய அரசுகள் என்.எல்.சி. பங்குகளை விற்று தனியார்மயத்தை புகுத்த முயற்சித்த நேரத்தில், திமுக எடுத்த முன்னெச்சரிக்கை நடவடிக்கைகளின் காரணமாக அது தடுக்கப்பட்டு இன்றளவும் இந்தியாவிலேயே அதிக ஊதியம் பெறக்கூடிய தொழிலாளர்கள் பணியாற்றக்கூடிய பொதுத்துறை நிறுவனமாக என்.எல்.சி. நிறுவனம் விளங்குகிறது.

கடந்த தேர்தல்களில் பெரும்பான்மையான தொழிலாளர்களின் வாக்குகளோடு தொழிலாளர் முன்னேற்றச் சங்கம் முதன்மை சங்கமாகத் தேர்ந்தெடுக்கப்பட்டுப் பல்வேறு நலப் பணிகளைச் சிறப்பாக ஆற்றி உள்ளது. குறிப்பாக, கொரோனாவால் உயிரிழந்த குடும்பங்களின் 124 வாரிசுகளுக்கு வேலை பெற்றுக் கொடுத்திருக்கிறோம். ஒப்பந்த தொழிலாளர்களாக பணியாற்றிய 3154 தொழிலாளர்களை சொசைட்டி தொழிலாளர்களாகவும், சொசைட்டி தொழிலாளர்களாக இருந்த 2173 தோழர்களை நிரந்தர தொழிலாளர்களாகவும், டிப்ளமோ மைனிங் முடித்த 180 இளைய தோழர்களை நிரந்தர பணியாளர்களாக நியமனம் செய்ய வைத்திருக்கிறோம்.

‘‘இதனை இதனால் இவன்முடிக்கும் என்றாய்ந்து அதனை அவன்கண் விடல்” – என்ற வள்ளுவரின் வாக்கிற்கு ஏற்ப, கடந்த காலத்தில் திமுகவும், தொழிலாளர் முன்னேற்றச் சங்கமும் ஆற்றி இருக்கக்கூடிய எண்ணில் அடங்கா நலப் பணிகளைக் கருத்தில் கொண்டு 25ம் தேதி (இன்று) நெய்வேலி நிலக்கரி நிறுவனத்தில் நடைபெற இருக்கின்ற ரகசிய வாக்கெடுப்பில் தொழிலாளர் முன்னேற்றச் சங்கத்தை எண்.6-ல் வாக்களித்து தனிப்பெரும் சங்கமாக உருவாக்கித் தர வேண்டும் என்று உங்களில் ஒருவனான நான், உங்கள் அனைவரையும் அன்புடன் வேண்டுகிறேன். இவ்வாறு அதில் கூறப்பட்டுள்ளது.

The post என்எல்சி சங்க அங்கீகார தேர்தலில் எண் 6ல் வாக்களித்து தொமுசவை தனிப்பெரும் சங்கமாக உருவாக்கி தர வேண்டும்: தொழிலாளர்களுக்கு முதல்வர் மு.க.ஸ்டாலின் வேண்டுகோள் appeared first on Dinakaran.