இரவில் தவிர்க்க வேண்டிய பழங்கள்!

பழங்களில் இயற்கையான இனிப்பும், ஊட்டச் சத்துக்களும் நிறைந்திருப்பதால் அவை ஆரோக்கியத்திற்கு அவசியமானவையாக விளங்குகின்றன. இருப்பினும் எல்லா பழங்களையும் விரும்பிய நேரத்தில் சாப்பிடக் கூடாது. சில பழங்கள் இரவில் தூங்குவதற்கு முன்பு சாப்பிடுவதற்கு ஏற்றவை அல்ல. அந்த பழங்கள் பற்றியும், அவற்றை சாப்பிடக் கூடாததற்கான காரணங்களை பற்றியும் அறிந்து கொள்வது அவசியம்.

அன்னாசி: அன்னாசி பழத்தில் புரோமெலைன் என்ற நொதி உள்ளது. இந்த நொதி செரிமானத்திற்கு உதவும். அதே வேளையில் அன்னாசி பழத்தை அதிகமாகவோ, வெறும் வயிற்றில் உட்கொள்ளும்போதோ இரைப்பையில் கோளாறுகளை ஏற்படுத்தும். அதிலும் தூங்குவதற்கு முன்பு அன்னாசி பழம் சாப்பிடும்போது புரோமெலைன் நொதி இரைப்பை அமிலத்தின் உற்பத்தியை தூண்டி அஜீரணம், வீக்கம், வாயுதொல்லை உள்ளிட்ட பிரச்னை ஏற்படுத்துவதற்கான வாய்ப்பை அதிகமாக்கும்.

வாழைப்பழம்: வாழைப்பழத்தில் கார்போஹைட்ரேட்டுகள், இயற்கை சர்க்கரைகள், பொட்டாசியம் மற்றும் மெக்னீசியம் நிறைந்துள்ளன. இவை ரத்தத்தில் சர்க்கரை அளவை உயர்த்தும். உடலுக்கு விரைவான ஆற்றலை அளிக்கும். தூங்குவதற்கு முன்பு வாழைப்பழம் சாப்பிடுவது நன்மை தரும் என்றாலும் அதிகமாக உட்கொள்வது அசவுகரியத்தை உண்டாக்கும்.

மாம்பழம்: மாம்பழத்தில் இயற்கையான சர்க்கரையும், நார் சத்தும் அதிகம். உறங்குவதற்கு முன்பு மாம்பழம் சாப்பிடும்போது ரத்தத்தில் சர்க்கரையின் அளவு விரைவாக அதிகரிக்கக் கூடும். தூக்க முறையும் சீர்குலையும். மாம்பழத்தில் நார் சத்து அதிகம் இருக்கும். தலைவலி, வயிறு சார்ந்த பிரச்னை உள்ளவர்கள் அதனை இரவில் அதிகம் சாப்பிடுவது செரிமான பிரச்னைகளை ஏற்படுத்தும்.

தர்பூசணி: நீர்சத்து நிறைந்த இந்த பழம் உடலுக்கு புத்துணர்ச்சியும் ஊட்டக் கூடியது. ஆனால் அதிக நீர் உள்ளடக்கமாக இருக்கும் காரணத்தால் டையூரிடிக் ஆகி செயல்பட்டு சிறுநீர் உற்பத்தியை அதிகரிக்க செய்துவிடும். இரவில் அடிக்கடி எழுந்து சிறுநீர் கழிக்க வேண்டியிருக்கும் என்பதால் தூக்கம் தடைபடும். குறிப்பாக இரவில் அதிக அளவு தர்பூசணி சாப்பிட்டால் அதிகப்படியான நீர் மற்றும் சர்க்கரையை ஜீரணிக்க உடல் போராட வேண்டியிருக்கும். சிலருக்கு வாந்தி, குமட்டல் உண்டாகும் படியான எதுக்களிப்பு பிரச்னைகளும் உண்டாகும்.

சிட்ரஸ் பழங்கள்: ஆரஞ்சு, திராட்சை, எலுமிச்சை பழம் போன்ற சிட்ரஸ் பழங்கள் அமிலத்தன்மை கொண்டவை. தூங்குவதற்கு முன்பு அவற்றை உட்கொண்டால் சிலருக்கு அசிடிட்டி அல்லது நெஞ்செரிச்சல் ஏற்படலாம். ஏனெனில் சிட்ரஸ் பழங்களில் உள்ள அதிக அமிலத்தன்மை வயிற்றின் குடல் பகுதியை எரிச்சலடைய செய்து செரிமான பிரச்னைகள் மற்றும் அசவுகரியத்தை ஏற்படுத்தும். அசிடிட்டி, இரைப்பை உணவு குழாய் ரிப்ளக்ஸ் நோய் கொண்ட நபர்களுக்கு பாதிப்பை அதிகரிக்கச் செய்து விடும்.

ஆப்பிள், மாதுளை, பேரிக்காய், பப்பாளி, சீதாப்பழம், கொய்யா, ஸ்ட்ராபெர்ரி, டிராகன் பழம், அத்தி, வாழைப் பழத்திலேயே இளக்கி என்னும் சிறிய வகை, இப்படியான பழங்கள் சாப்பிடலாம்.
– அ.ப.ஜெயபால்

The post இரவில் தவிர்க்க வேண்டிய பழங்கள்! appeared first on Dinakaran.