இன்று தி.மு.க. மாவட்ட செயலாளர்கள் கூட்டம்

சென்னை,

தமிழக சட்டசபை தேர்தலுக்கு இன்னும் 10 மாதங்களே இருக்கும் நிலையில், அதை எதிர்கொள்ள ஆளுங்கட்சியான தி.மு.க. முன்கூட்டியே தயாராகிவருகிறது. அதன் ஒருபகுதியாக, கடந்த 1-ந் தேதி தி.மு.க. பொதுக்குழு கூட்டம் மதுரையில் நடத்தப்பட்டது. அதனைத் தொடர்ந்து, ஜூன் 7-ந் தேதி (இன்று ) தி.மு.க. மாவட்ட செயலாளர்கள், எம்.பி. - எம்.எல்.ஏ.க்கள், தொகுதிப் பார்வையாளர்கள் கூட்டம் நடைபெற இருக்கிறது.

காணொலிக்காட்சி வழியாக காலை 10.30 மணிக்கு நடைபெறும் இந்தக் கூட்டத்தில், கட்சியின் தலைவரும், முதல்-அமைச்சருமான மு.க.ஸ்டாலின் நிர்வாகிகள் மத்தியில் பேச இருக்கிறார். அப்போது, சட்டமன்ற தேர்தலுக்கான முன்னெடுப்புகள் குறித்து ஆலோசனை வழங்க இருக்கிறார். இதற்கான அறிவிப்பை கட்சியின் பொதுச் செயலாளர் துரைமுருகன் வெளியிட்டுள்ளார். அதில் கூறப்பட்டுள்ளதாவது:-

தி.மு.க. தலைவர் மு.க.ஸ்டாலின் தலைமையில் மாவட்ட செயலாளர்கள், நாடாளுமன்ற, சட்டமன்ற உறுப்பினர்கள், தொகுதி பார்வையாளர்கள் கூட்டம் 7-6-2025 சனிக்கிழமை காலை 10.30 மணிக்கு காணொலிக்காட்சி வாயிலாக நடைபெறும்.

அதில், மாவட்ட செயலாளர்கள், நாடாளுமன்ற, சட்டமன்ற உறுப்பினர்கள், தொகுதி பார்வையாளர்கள் அனைவரும் தவறாமல் கலந்துகொள்ளும்படி கேட்டுக்கொள்கிறேன். கூட்டத்தில் உறுப்பினர் சேர்க்கை தொடர்பாக விவாதிக்கப்பட இருக்கிறது.

இவ்வாறு அதில் கூறப்பட்டுள்ளது.